श्रीगोंदा : प्रतिनिधी
मुख्यमंत्री बळीराजा शिव पानंद रस्ता योजनेअंतर्गत मौजे घारगाव येथे रस्त्याची पाहणी व हद्दखुणा मोजणीचे काम उरकून आलेल्या भूमी अभिलेख कार्यालयाच्या कर्मचाऱ्यास व्हॉट्सअॅपवर व्हाईस क्लिप पाठवून शिवीगाळ करत जिवे मारण्याची धमकी दिल्याचा प्रकार समोर आला आहे. या प्रकरणी दोषींवर तात्काळ गुन्हा दाखल करावा, अन्यथा जिल्हाभरात कामबंद आंदोलन छेडण्याचा इशारा भूमी अभिलेख कर्मचाऱ्यांच्या वतीने देण्यात आला आहे.
मिळालेल्या माहितीनुसार, ३१ ऑगस्ट २०२६ रोजी तहसीलदारांच्या आदेशानुसार उप अधीक्षक भूमी अभिलेख श्रीगोंदा कार्यालयातील प्र. परिरक्षण भूमापक वासुदेव छोटुलाल पाटील हे मौजे घारगाव येथे रस्ता मोजणी व हद्दखूण दाखवण्याच्या कामासाठी गेले होते. मोजणीचे काम पूर्ण झाल्यानंतर, त्याच दिवशी सायंकाळी सुमारे ४:४६ वाजता रस्त्यालगतचे खातेदार पोपट दशरथ खामकर यांनी पाटील यांच्या मोबाईलवर एक व्हॉट्सअॅप व्हाईस क्लिप पाठवली. या क्लिपमध्ये त्यांनी कर्मचाऱ्यास अश्लील शिवीगाळ करत जिवे मारण्याची धमकी दिली.
याप्रकरणी २ सप्टेंबर २०२६ रोजी श्रीगोंदा पोलीस ठाण्याच्या पोलीस निरीक्षकांना निवेदन सादर करण्यात आले आहे. या घटनेची चौकशी करून संशयित आरोपीवर तात्काळ गुन्हा दाखल करून त्यास अटक करावी, अशी मागणी निवेदनाद्वारे करण्यात आली आहे. गुन्हा दाखल न झाल्यास भूमी अभिलेख संघटनेतर्फे रीतसर कामबंद आंदोलन छेडले जाईल, असा इशारा देण्यात आला आहे.
या निवेदनावर भूमी अभिलेख विभागाचे अविनाश ठोकळ, शिंगाडे, वासुदेव पाटील, संगीता कापडणी, प्रतिभा करंजे, सुधीर देशमुख, फलके, लढाडे, कानीफ भापकर, आकाश परकाळे, सूफियान मोमिन, मानसी भैलुमे, अमृता पाटील, अंबादास जेजुरकर आणि सचिन बारस्कर यांच्या सह्या आहेत. सदर निवेदनाच्या प्रती महसूल मंत्री, जमाबंदी आयुक्त, अहिल्यानगरचे जिल्हाधिकारी आणि पोलीस अधीक्षक यांच्यासह विविध वरिष्ठ अधिकाऱ्यांना पाठवण्यात आल्या आहेत.
