विद्यार्थ्यांना शिक्षणापासून वंचित ठेवणारा केविलवाणा प्रकार; आदिवासी विध्यार्थी एकता मंच अहेरी विधानसभा क्षेत्र युवा नेते कैलाशभाऊ कोरेत यांचा संताप
प्रतिनिधी : सुगत उराडे
दि. २ सप्टेंबर २०२६
अहेरी : आलापल्ली येथे बाहेरगावाहून शिक्षणासाठी येणाऱ्या विद्यार्थ्यांच्या अडचणी दिवसेंदिवस गंभीर होत असून, मानव विकास योजनेअंतर्गत उपलब्ध असलेल्या बससेवेचा विद्यार्थ्यांना अपेक्षित लाभ मिळत नसल्याचे विदारक चित्र समोर आले आहे.
शाळा सुटण्याची वेळ लक्षात घेता विद्यार्थ्यांना अर्धा तास अगोदर सुट्टी देण्यात येत असली, तरी सुट्टी झाल्यानंतरही विद्यार्थ्यांना बसची प्रतीक्षा करण्यासाठी तब्बल तीन तासांपर्यंत बसस्थानक परिसरात थांबावे लागत असल्याची परिस्थिती निर्माण झाली आहे. रात्री उशिरा बस येत असल्याने विद्यार्थ्यांचा मौल्यवान शैक्षणिक वेळ वाया जात असून, घरी पोहोचण्यासही मोठा विलंब होत आहे.
या प्रकाराचा थेट परिणाम विद्यार्थ्यांच्या अभ्यासावर होत असून, त्यांच्या शैक्षणिक प्रगतीमध्ये अडथळे निर्माण होत आहेत. दिवसभर शिक्षण घेतल्यानंतर रात्री उशिरापर्यंत बसस्थानकावर थांबावे लागत असल्याने विद्यार्थ्यांना शारीरिक व मानसिक त्रास सहन करावा लागत आहे.
मुलींच्या सुरक्षेचा गंभीर प्रश्न
रात्र झाल्यानंतर बसस्थानक परिसरात विद्यार्थ्यांना थांबावे लागत असल्याने त्यांच्या सुरक्षेचा गंभीर प्रश्न निर्माण झाला आहे. अंधारात विद्यार्थ्यांना असुरक्षिततेची भावना, मानसिक ताण आणि भीतीचा सामना करावा लागत आहे. विशेषतः मुली आणि लहान विद्यार्थ्यांना या परिस्थितीचा अधिक त्रास सहन करावा लागत असून, पालकांमध्येही चिंतेचे वातावरण निर्माण झाले आहे.
विद्यार्थ्यांच्या शैक्षणिक हितासोबतच त्यांच्या सुरक्षिततेचा विचार करून बससेवा नियमित, वेळेवर आणि पुरेशा फेऱ्यांसह उपलब्ध करून देणे अत्यावश्यक आहे. बस उशिराने येण्याची समस्या तातडीने दूर करून विद्यार्थ्यांना सुरक्षित व वेळेवर प्रवासाची सुविधा उपलब्ध करून द्यावी, अशी मागणी पालक व विद्यार्थ्यांकडून होत आहे.
अन्यथा तीव्र आंदोलनाचा इशारा
विद्यार्थ्यांच्या या गंभीर समस्येकडे प्रशासन व संबंधित विभागाने तातडीने लक्ष देऊन योग्य तो तोडगा काढावा. अन्यथा विद्यार्थ्यांच्या शैक्षणिक व सुरक्षिततेच्या प्रश्नासाठी तीव्र आंदोलन छेडण्यात येईल, असा इशारा आदिवासी विद्यार्थी एकता मंचाचे अहेरी विधानसभा क्षेत्रातील युवा नेते कैलाशभाऊ कोरेत यांनी दिला आहे.
