🌈 तुकाराम मुंढे इफेक्ट? रस्त्यावरील खाद्यपदार्थांचा रंगच बदलला!

पिंपोडे मिथुन महाजन : महाराष्ट्राचे FDA आयुक्त तुकाराम मुंढे यांच्या नेतृत्वाखाली खाद्यपदार्थांमधील भेसळ, अस्वच्छता आणि नियमबाह्य कृत्रिम रंगांच्या वापराविरोधात कारवाई सुरू आहे. या कारवाईचा परिणाम आता रस्त्यावरील खाद्यपदार्थांवरही दिसू लागल्याची चर्चा सोशल मीडियावर रंगली आहे.

या कारवाईनंतर अनेक खाद्यविक्रेते पदार्थांमध्ये वापरले जाणारे कृत्रिम रंग कमी करत असल्याचे किंवा टाळत असल्याचे चित्र दिसत आहे. याचा सर्वाधिक लक्षवेधी परिणाम ‘बुढ्ढी के बाल’ अर्थात कॉटन कँडीवर पाहायला मिळत आहे. पूर्वी गुलाबी किंवा भडक रंगात दिसणारी कॉटन कँडी आता काही ठिकाणी पांढऱ्या रंगात विकली जात असल्याचे फोटो आणि व्हिडीओ सोशल मीडियावर व्हायरल होत आहेत.
इतकेच नाही, तर नूडल्स, मंचुरियन, चिकन लॉलीपॉप, शावरमा आणि इतर स्ट्रीट फूडच्या रंगातही बदल दिसत असल्याचे सांगितले जात आहे. पूर्वी भडक लाल किंवा नारंगी रंगात दिसणारे पदार्थ आता तुलनेने फिकट आणि नैसर्गिक रंगात दिसत आहेत.
या बदलाला सोशल मीडियावर नागरिकांकडून ‘तुकाराम मुंढे इफेक्ट’ असे म्हटले जात आहे. FDAच्या तपासण्या आणि कारवाईमुळे खाद्यविक्रेत्यांमध्ये नियमांचे पालन करण्याबाबत सावधगिरी वाढल्याची चर्चा आहे.
मात्र, प्रत्येक रंगीत खाद्यपदार्थ धोकादायक असतो असे नाही. नियमांनुसार परवानगी असलेले खाद्यरंग ठरावीक मर्यादेत वापरता येतात. प्रश्न आहे तो अनधिकृत किंवा नियमबाह्य रंगांच्या वापराचा. पदार्थ अधिक आकर्षक दिसावा म्हणून भडक रंगांचा गैरवापर होऊ नये, यासाठी FDAची कारवाई महत्त्वाची ठरत आहे.
कालपर्यंत पदार्थ आकर्षक दिसण्यासाठी रंगवले जात होते…
आता कारवाईनंतर पदार्थांचा ‘खरा रंग’ समोर येतोय!