दर्यापूर:प्रतिनिधी
दिपक मेश्राम
स्थानिक के. डी. सीकची स्कूल येथे गोकुळाष्टमी आणि दहीहंडीचा सण अत्यंत जल्लोषात आणि उत्साही वातावरणात साजरा करण्यात आला. या कार्यक्रमात शाळेतील विद्यार्थ्यांनी उत्स्फूर्त सहभाग नोंदवला.
कार्यक्रमाची सुरुवात श्रीकृष्णाच्या प्रतिमेचे पूजन आणि आरती करून करण्यात आली. याप्रसंगी चिमुकल्या विद्यार्थ्यांनी श्रीकृष्ण आणि राधा यांची मनमोहक रूपे धारण केली होती. लहानग्या गोपाळांच्या आणि राधांच्या वेशभूषेने सर्वांचेच लक्ष वेधून घेतले.
उत्सवाचे मुख्य आकर्षण ठरलेली दहीहंडी फोडण्यासाठी विद्यार्थ्यांमध्ये मोठा उत्साह पाहायला मिळाला. ‘गोविंदा आला रे आला’ आणि ‘कृष्ण कन्हैया लाल की जय’ च्या जयघोषात विद्यार्थ्यांनी मानवी मनोरे रचून दहीहंडी यशस्वीरीत्या फोडली. या प्रसंगी संपूर्ण परिसर भक्तीमय आणि आनंददायी वातावरणाने दुमदुमून गेला होता.
शाळेचे मुख्याध्यापक, शिक्षकवृंद आणि शिक्षकेतर कर्मचाऱ्यांनी विद्यार्थ्यांना गोकुळाष्टमीच्या सणाचे महत्त्व समजावून सांगितले आणि सर्वांना शुभेच्छा दिल्या.
