पाथरी / प्रतिनिधी : अहमद अन्सारी पाथरी परभणी
पाथरी तालुक्यातील लोणी बु. येथील गट क्रमांक २८१ मधील गेल्या पाच वर्षांपासून रखडलेला रस्ता अखेर महसूल प्रशासन व पोलीस प्रशासनाच्या संयुक्त सहकार्याने गुरुवार, दि. ३ सप्टेंबर २०२६ रोजी खुला करण्यात आला. त्यामुळे या रस्त्याचा वापर करणाऱ्या शेतकऱ्यांना मोठा दिलासा मिळाला आहे.
गट क्रमांक २८१ मधील रस्ता मागील अनेक वर्षांपासून विविध कारणांमुळे बंद होता. त्यामुळे परिसरातील शेतकऱ्यांना आपल्या शेतात जाण्या-येण्यासाठी अडचणींचा सामना करावा लागत होता. शेतीची कामे, कृषी साहित्याची वाहतूक तसेच शेतमालाची ने-आण करताना शेतकऱ्यांना मोठा त्रास सहन करावा लागत होता.
या प्रश्नाबाबत प्रशासनाकडे वेळोवेळी पाठपुरावा करण्यात आल्यानंतर महसूल प्रशासनाने या प्रकरणाची दखल घेतली. अखेर गुरुवारी महसूल प्रशासन आणि पोलीस प्रशासनाच्या उपस्थितीत प्रत्यक्ष पाहणी व आवश्यक कार्यवाही करून गट क्रमांक २८१ मधील रस्ता खुला करण्यात आला.
यावेळी मंडळ अधिकारी बागुल साहेब, तलाठी शर्मा साहेब, भूमी अभिलेख विभागाचे शेख साहेब, महसूल कोतवाल परमेश्वर पवार साहेब, बिट जमादार बालाजी लटपटे साहेब, बीट जमादार दहिफळे साहेब, PSI राठोड साहेब, तसेच पोलीस कर्मचारी व महिला पोलीस कर्मचारी उपस्थित होते. परिसरातील शेतकरी व नागरिकही मोठ्या संख्येने उपस्थित होते.
पाच वर्षांपासून प्रलंबित असलेला रस्त्याचा प्रश्न प्रशासनाच्या हस्तक्षेपामुळे मार्गी लागल्याने परिसरातील शेतकऱ्यांनी समाधान व्यक्त केले. रस्ता खुला झाल्यामुळे शेतकऱ्यांना शेतीच्या कामांसाठी ये-जा करणे सुलभ होणार असून, शेतीमालाची वाहतूक करण्यासाठीही मोठी सुविधा उपलब्ध झाली आहे.
पाच वर्षांपासून रखडलेल्या रस्त्याचा प्रश्न अखेर मार्गी लागल्याने शेतकऱ्यांमध्ये समाधानाचे वातावरण निर्माण झाले आहे. महसूल व पोलीस प्रशासनाने केलेल्या संयुक्त कार्यवाहीचे परिसरातील नागरिकांकडून स्वागत करण्यात आले.
