शहादा:
शहादा येथील व्हॉलंटरी महिला मंडळ संचलित प्राथमिक, माध्यमिक व उच्च माध्यमिक विद्यालयात श्रीकृष्ण जन्माष्टमीनिमित्त ‘दहीहंडी उत्सव’ अत्यंत उत्साही व मंगलमय वातावरणात साजरा करण्यात आला. या कार्यक्रमात केजी (सिनिअर ग्रुप) पासून ते इयत्ता १० वी पर्यंतच्या विद्यार्थ्यांनी उत्स्फूर्त सहभाग नोंदवून विविध कलागुण सादर केले.
कार्यक्रमाची सुरुवात सिनिअर ग्रुपच्या लहान बालकांच्या मनमोहक राधा-कृष्ण नृत्याने झाली. चिमुकल्यांच्या वेशभूषेने आणि नृत्याविष्काराने उपस्थितांची मने जिंकली. त्यानंतर माध्यमिक विभागाच्या विद्यार्थ्यांनी विविध पारंपरिक व देशभक्तीपर गीतांवर नृत्ये सादर केली. कार्यक्रमाच्या अंतिम टप्प्यात शालेय विद्यार्थ्यांनी मानवी मनोरे रचत ‘गोविंदा आला रे आला’च्या जयघोषात दहीहंडी फोडली. हंडी फुटताच संपूर्ण परिसर टाळ्या आणि जल्लोषाने दुमदुमला.
या प्रसंगी संस्थेचे माननीय सचिव, संचालक मंडळ, माजी मुख्याध्यापिका मॅडम, सर्व शिक्षकवृंद, शिक्षकेतर कर्मचारी व विद्यार्थी मोठ्या संख्येने उपस्थित होते. संस्थेच्या मान्यवरांनी विद्यार्थ्यांना जन्माष्टमीच्या शुभेच्छा दिल्या व भारतीय संस्कृती, सण आणि त्यामागील एकतेचे महत्त्व स्पष्ट केले. शिस्तबद्ध नियोजन आणि विद्यार्थ्यांचा अथांग उत्साह यामुळे कार्यक्रम अत्यंत दिमाखात पार पडला.
