अन्यथा ‘वंचित स्टाईलने’ उत्तर देऊ; वंचित बहुजन आघाडीचा फायनान्स कंपन्यांना कडक इशारा
अकोट :(डॉ. संतोष गायगोले तालुका प्रतिनिधी )
अकोला जिल्हा दुष्काळग्रस्त जाहीर होऊन महिना उलटला तरी अद्याप शासनाकडून शेतकरी आणि शेतमजुरांना प्रत्यक्ष कोणतीही मदत मिळालेली नाही. नैसर्गिक संकटामुळे शेतकरी पूर्णपणे हवालदिल झालेला असताना, दुसरीकडे फायनान्स व मायक्रो फायनान्स कंपन्यांनी कर्ज वसुलीसाठी तगादा लावला आहे. या जबरी वसुलीविरोधात वंचित बहुजन आघाडी (अकोला जिल्हा व महानगर) तर्फे आज जिल्हाधिकाऱ्यांना निवेदन देऊन तत्काळ वसुली थांबवण्याची मागणी करण्यात आली.
वंचित बहुजन आघाडीच्या महाराष्ट्र प्रदेश कार्यकारिणीच्या सूचनेनुसार, अकोला जिल्हाधिकारी कार्यालयावर सर्व विंगच्या वतीने हे निवेदन देण्यात आले. या पार्श्वभूमीवर फायनान्स कंपन्यांना स्पष्ट इशारा देण्यात आला की, दुष्काळी परिस्थितीत जर शेतकरी आणि कामगारांवर वसुलीसाठी सक्ती किंवा दबाव आणला, तर ‘वंचित स्टाईलने’ योग्य उत्तर दिले जाईल.
निवेदनातील प्रमुख मागण्या व मुद्दे:
- शासकीय मदतीची प्रतीक्षा: पाऊस न पडल्याने अकोल्यातील शेतकरी व शेतमजूर आर्थिक संकटात आहेत. जिल्हा दुष्काळग्रस्त घोषित होऊनही शासनाची मदत पोहोचलेली नाही.
- जबरी वसुलीस बंदी: ग्रामीण भागातील नागरिकांनी उपजीविकेसाठी मायक्रो फायनान्सकडून कर्ज घेतले आहे. दुष्काळामुळे हप्ते भरणे अशक्य असताना कंपन्यांकडून होणारा छळ थांबवावा.
प्रमुख पदाधिकाऱ्यांची उपस्थिती:
या वेळी निवेदने देताना वंचित बहुजन आघाडीचे प्रमुख पदाधिकारी उपस्थित होते जिल्हाध्यक्ष प्रमोद देंडवे, जिल्हा महासचिव मिलिंद इंगळे, युवक जिल्हाध्यक्ष श्रीकांत घोगरे, महासचिव राजकुमार दामोदर पश्चिम महानगर अध्यक्ष मजहर खान, पश्चिम महासचिव गजानन गवई, महिला शहराध्यक्ष सुवर्णाताई जाधव, महासचिव सरोजताई वाकोडे, मायाताई इंगळे दामोदर जगताप, ज्ञानेश्वर सुलताने, पूर्व तालुका अध्यक्ष किशोर जामणीक, महासचिव शरद इंगोले, राम गव्हाणकर, डॉ. अशोक मेश्राम, नितीन सपकाळ, ॲड. समीर विखे, सय्यद वासिम, नागेश उमाळे, बबलू शिरसाट, सूरज दामोदर, खंडारे भाऊ, पवन डोंगरे, संतोष कीर्तक यांच्यासह बहुसंख्य कार्यकर्ते उपस्थित होते.
