जगदंब सांस्कृतिक मंडळाच्या वतीने चक्री पाळणा,मिकी माऊस व जंपिंग जपंग हे ठरताहेत विशेष आकर्षण
कुंदा कांबळे मायणी (प्रतिनिधी) : मायणी येथील जगदंब सांस्कृतिक मंडळाच्या वतीने नवरात्रोत्सवानिमित्त बालचमूंसाठी मनोरंजनाची खास पर्वणी उपलब्ध करून देण्यात आली आहे. उत्सवाच्या निमित्ताने उभारण्यात आलेला गोलाकार पाळणा आणि मिकी माऊस, जंपिंग जपांग हे लहान मुलांसाठी विशेष आकर्षण ठरत असून, बालचमूंच्या किलबिलाटाने उत्सव परिसर गजबजून जात आहे.
नवरात्रोत्सव म्हणजे भक्ती, श्रद्धा आणि आनंदाचा संगम! याच उत्सवी वातावरणात लहान मुलांच्या आनंदालाही विशेष स्थान देत जगदंब सांस्कृतिक मंडळाने मनोरंजनाच्या विविध सुविधा उपलब्ध करून दिल्या आहेत. गोलाकार पाळण्यात बसण्याचा आनंद आणि मिकी माऊस जंपिंगवर मनसोक्त उड्या मारण्याची मजा लुटण्यासाठी बालचमूंचा उत्साह पाहण्यासारखा आहे.
रंगीबेरंगी पाळणे, मुलांचा हास्यकल्लोळ आणि पालकांची उपस्थिती यामुळे उत्सवाला कौटुंबिक आनंदमेळाव्याचे स्वरूप प्राप्त झाले आहे. देवीच्या दर्शनाबरोबरच मुलांना मनमुराद आनंद लुटण्याची संधी मिळत असल्याने नवरात्रोत्सवाचा उत्साह अधिकच द्विगुणित झाला आहे.
धार्मिक उत्सवाला सामाजिक आणि सांस्कृतिक आनंदाची जोड देण्याचा जगदंब सांस्कृतिक मंडळाचा हा उपक्रम लक्षवेधी ठरत आहे. नवरात्रोत्सवातील भक्तिमय वातावरणात बालचमूंच्या चेहऱ्यावरील निरागस हास्य आणि आनंदाची उधळण उत्सवाची शोभा वाढवत आहे.
