मळद (प्रतिनिधी) : श्री भैरवनाथ ग्रामविकास प्रतिष्ठान आणि एमआयटी कॉलेज, बोरीबेल यांच्या संयुक्त विद्यमाने शेतकरी बांधवांना आधुनिक शेती तंत्रज्ञानाचे प्रशिक्षण देण्याचा उपक्रम हाती घेण्यात आला आहे. एमआयटी कॉलेज, बोरीबेलचे डायरेक्टर श्री. हर्षवर्धनजी पाटील साहेब आणि युवा उद्योजक अजय म्हेत्रे यांच्या प्रयत्नातून हा उपक्रम राबविण्यात येत आहे.
या उपक्रमांतर्गत आगामी काळात बोरीबेल येथील लाईफ ट्रान्समिशन सेंटरमध्ये शेतकऱ्यांना आधुनिक तंत्रज्ञानाच्या साहाय्याने शेती कशी करावी, याबाबत मार्गदर्शन व प्रशिक्षण देण्यात येणार आहे.
या प्रशिक्षणाचा लाभ मळद परिसरातील जास्तीत जास्त शेतकऱ्यांना मिळावा, या उद्देशाने आज गावात शेतकऱ्यांची नावनोंदणी करण्यासाठी विशेष पथक आले होते. यावेळी अनेक शेतकरी बांधवांनी उत्स्फूर्त प्रतिसाद देत प्रशिक्षणासाठी आपली नावे नोंदवली.
आधुनिक शेती पद्धती, नवीन तंत्रज्ञानाचा वापर आणि शेती अधिक फायदेशीर करण्यासाठी आवश्यक असलेले मार्गदर्शन या प्रशिक्षणातून मिळणार आहे. त्यामुळे शेतकऱ्यांना आधुनिक शेती तंत्रज्ञानाची ओळख होऊन त्यांच्या शेतीच्या प्रगतीला चालना मिळणार आहे.
यावेळी श्री भैरवनाथ ग्रामविकास प्रतिष्ठानचे अध्यक्ष किशोर (दादा) नवले, प्रगतशील बागायतदार प्रदीप झुरुंगे, संतोष म्हेत्रे (माजी सरपंच, मळद), सागर शेलार, शिवाजी सोनवणे, युवा उद्योजक कालिदास रणवरे, पाटील माजी उपसरपंच संजय रणवरे, शेतकरी बांधव व भगिनी तसेच हळद गावचे कृषी सहाय्यक अझरुद्दीन सय्यद आदी मान्यवर उपस्थित होते.
शेतकऱ्यांच्या हितासाठी राबविण्यात येत असलेल्या या उपक्रमासाठी पुढाकार घेणारे एमआयटी कॉलेज, बोरीबेलचे डायरेक्टर श्री. हर्षवर्धनजी पाटील साहेब, युवा उद्योजक अजय म्हेत्रे आणि नावनोंदणीसाठी गावात आलेल्या पथकाचे श्री भैरवनाथ ग्रामविकास प्रतिष्ठानच्या वतीने मनःपूर्वक आभार व्यक्त करण्यात आले.
