चिंचणी वांगी पोलिसांची धडक कारवाई; १ लाख ५२ हजारांचा मुद्देमाल जप्त
चिंचणी , ता. कडेगाव : वांगी (ता. कडेगाव) येथील दारू दुकान फोडून मद्यसाठा चोरणाऱ्या दोघांना चिंचणी वांगी पोलिसांनी अवघ्या २४ तासांत अटक केली. या कारवाईमुळे परिसरात पोलिसांच्या तत्परतेचे कौतुक होत आहे.
पोलिसांनी दिलेल्या माहितीनुसार, दि. ११ ऑक्टोबर २०२६ रोजी रात्री १० वाजल्यापासून ते दि. १२ ऑक्टोबर रोजी सकाळी ७.३० वाजण्याच्या दरम्यान वांगी गावातील कडेपूर रोडलगत असलेल्या देशी दारूच्या दुकानात चोरी झाली. अज्ञात चोरट्यांनी दुकानाच्या लाकडी दरवाजाची कडी कोयंडा कापून आत प्रवेश केला आणि सुमारे ६० हजार रुपये किमतीच्या मद्यसाठ्यासह इतर साहित्य चोरून नेले.
या घटनेची माहिती मिळताच चिंचणी वांगी पोलिसांनी तपासाची चक्रे वेगाने फिरवली. गोपनीय माहिती आणि कौशल्यपूर्ण तपासाच्या आधारे पोलिसांनी दोन्ही संशयित आरोपींना २४ तासांच्या आत ताब्यात घेतले. त्यांच्याकडून चोरीचा मुद्देमाल हस्तगत करण्यात आला असून, या प्रकरणाचा पुढील तपास सुरू आहे.
ही कारवाई पोलीस अधीक्षक तुषार दोशी, उपविभागीय पोलीस अधिकारी सदाशिव शेलार यांच्या मार्गदर्शनाखाली सहाय्यक पोलीस निरीक्षक किशोरकुमार खाडे, पोलीस उपनिरीक्षक योगेश शेलार व तपास पथकाने केली.
चिंचणी वांगी पोलिसांच्या तत्पर कारवाईमुळे चोरीचा गुन्हा अल्पावधीत उघडकीस आला असून, परिसरातील गुन्हेगारीवर आळा घालण्यासाठी पोलिसांकडून प्रयत्न सुरू आहेत.
