वाढलेल्या झाडामुळे विद्युत अपघाताचा धोका; संबंधित विभागाने तातडीने लक्ष देण्याची मागणी
एरंडगाव : एरंडगाव येथे झाडावर चढत असताना विद्युत तारांचा स्पर्श झाल्याने एका वानराचा मृत्यू झाल्याची घटना घडली आहे. या घटनेमुळे परिसरात हळहळ व्यक्त केली जात आहे.
मिळालेल्या माहितीनुसार, एरंडगाव येथे विद्युत तारांजवळ असलेल्या झाडावर वानर चढत असताना त्याचा विद्युत तारांना स्पर्श झाला. त्यामुळे विद्युत प्रवाहाचा धक्का लागून वानराचा मृत्यू झाला. यापूर्वीदेखील या झाडामुळे अनेक वानरांचा मृत्यू झाल्याचे स्थानिकांकडून सांगण्यात येत आहे.
संबंधित झाड मोठ्या प्रमाणात वाढलेले असून त्याच्या फांद्या विद्युत तारांच्या संपर्कात येत असल्याने भविष्यातही अशा घटना घडण्याची शक्यता आहे. तसेच झाडाच्या फांद्यांमुळे विद्युत पुरवठा खंडित होण्याचीही भीती व्यक्त केली जात आहे.
महावितरण विभागाने तातडीने लक्ष देऊन विद्युत तारांना स्पर्श करणाऱ्या झाडाच्या फांद्यांची सुरक्षित छाटणी करावी किंवा आवश्यक ती कार्यवाही करावी, अशी मागणी ग्रामस्थांकडून करण्यात येत आहे. भविष्यात अशा दुर्दैवी घटना टाळण्यासाठी संबंधित विभागाने त्वरित उपाययोजना करणे गरजेचे आहे.
बातमीदार : राजेश चाटे
