खापरखेडा / सावनेर : परिवर्तनवादी चळवळीतील निर्भीड लेखक, विचारवंत आणि सामाजिक कार्यकर्ते मिलिंद कीर्ती यांच्या निधनाने परिवर्तनवादी चळवळीची मोठी हानी झाली आहे. बुद्ध, फुले, शाहू, आंबेडकरी विचारांचा वारसा लेखणीतून पुढे नेणारे, वंचितांच्या वेदनांना आवाज देणारे व्यक्तिमत्व म्हणून ते ओळखले जात होते.
अन्याय, अत्याचाराविरुद्ध त्यांनी आपल्या लेखणीतून कायम संघर्ष केला. तळागाळातील माणसाच्या प्रश्नांना त्यांनी आपल्या लेखनातून न्याय मिळवून देण्याचा प्रयत्न केला. त्यांचे निधन हे केवळ एका व्यक्तीचे जाणे नसून, परिवर्तनवादी चळवळीतील एका लढवय्याला हरवण्यासारखे आहे.
दरम्यान, १४ ऑक्टोबर हा परिवर्तनवादी चळवळीसाठी ऐतिहासिक महत्त्वाचा दिवस असताना, त्याच दिवशी मिलिंद कीर्ती यांनी जगाचा निरोप घेतल्याने चळवळीवर शोककळा पसरली आहे.
ज्येष्ठ विचारवंत ज्ञानेश्वर धुंदीदास रसक यांनी मिलिंद कीर्ती यांना भावपूर्ण श्रद्धांजली अर्पण करताना सांगितले की, मिलिंद कीर्ती यांची लेखणी समाजाला नेहमीच दिशा देणारी होती. त्यांच्या विचारांचा वारसा पुढे नेणे, हीच त्यांना खरी श्रद्धांजली ठरेल.
त्यांच्या निधनाने साहित्यिक, सामाजिक आणि परिवर्तनवादी चळवळीतील कार्यकर्त्यांमध्ये हळहळ व्यक्त होत आहे.
- नरेश कनोजे, सावनेर तालुका प्रतिनिधी, सारथी महाराष्ट्राचा न्यूज (खापरखेडा)
