जनहितासाठी सात दिवस अन्नत्याग, दारुभट्टीवर जेसीबी चालवली आंदोलक राहुल तिवारींसह ३९ जणांवर गुन्हे दाखल

सविस्तर वृत्त

उप-हेडलाईन :
चणकापूर-अण्णामोड चौकातील १९८७ पासूनची देशी दारू दुकान जमीनदोस्त; दुकानदाराचा १२ लाख नुकसानीचा दावा, तर प्रकृती खालावल्याने राहुल तिवारी रुग्णालयात

खापरखेडा (प्रतिनिधी) : देशी दारूची भट्टी हटविण्याच्या मागणीसाठी जनतेच्या हितासाठी सुरू असलेल्या अन्नत्याग आंदोलनाच्या सातव्या दिवशी चणकापूर येथील अण्णामोड चौकातील देशी दारू दुकानावर जेसीबी चालविण्यात आल्याने खापरखेडा परिसरात मोठी खळबळ उडाली आहे. या प्रकरणी खापरखेडा पोलिसांनी आंदोलनाचे नेते, माजी उपसभापती राहुल तिवारी यांच्यासह एकूण ३९ जणांवर (१० अज्ञातांसह) गुन्हे दाखल केले आहेत.

मिळालेल्या माहितीनुसार, राष्ट्रीय महामार्ग प्राधिकरणाच्या (NHAI) जागेवर १९८७ पासून देशी दारूचे दुकान सुरू असल्याचा दावा दुकानदार गिरीश मोतीलाल जयस्वाल (रा. ललतेरोडी, नागपूर) यांनी केला आहे. त्यांचे म्हणणे आहे की, या दुकानाचा परवाना १ एप्रिल २०२६ रोजी नवीनीकृत करण्यात आला होता व प्रकरण उच्च न्यायालयात न्यायप्रविष्ट होते.

दुसरीकडे, स्थानिक नागरिक, महिला व ग्रामपंचायतीची अनेक वर्षांपासून ही दारुभट्टी हटविण्याची मागणी होती. चनकापूर ग्रामपंचायतीने संबंधित दुकानाचा मालमत्ता कर बंद केला होता. तरीही कारवाई न झाल्याने राहुल तिवारी यांनी २ ऑक्टोबरपासून बेमुदत अन्नत्याग आंदोलन सुरू केले होते.

आंदोलनाच्या सातव्या दिवशी, ६ ऑक्टोबर रोजी दुपारी सुमारास राहुल तिवारी व त्यांच्या समर्थकांनी जेसीबीच्या साहाय्याने दुकान पाडले. यावेळी जिल्हा परिषद सदस्य प्रकाश खापरे, माजी उपसरपंच पिंकू उर्फ विश्वजित सिंग, हंसराज सुखदेव, राजेंद्र डोंगरे यांच्यासह मोठ्या संख्येने महिला व नागरिक उपस्थित होते. दारुभट्टी हटवल्याच्या आनंदात आंदोलकांनी फटाके फोडून जल्लोष केला. घटनास्थळी पोलिसांचा बंदोबस्त तैनात करण्यात आला होता.

दुकानदाराच्या तक्रारीनुसार, बांधकामाचे १० लाख व दारूसाठा व इतर साहित्याचे २ लाख असे एकूण १२ लाख रुपयांचे नुकसान झाले आहे. या तक्रारीवरून वरिष्ठ पोलीस निरीक्षक संदीप बुवा यांच्या मार्गदर्शनाखाली पोलीस उपनिरीक्षक अविनाश निकाळजे यांनी भारतीय न्याय संहितेच्या विविध कलमान्वये गुन्हा नोंदवून पुढील तपास सुरू केला आहे.

दरम्यान, सलग सात दिवसांच्या उपोषणामुळे राहुल तिवारी यांची प्रकृती खालावली. त्यांना हृदयाशी संबंधित त्रास जाणवू लागल्याने तातडीने रुग्णालयात दाखल करण्यात आले असून त्यांच्यावर उपचार सुरू आहेत.

जनहितासाठी आंदोलन करणाऱ्यांवरच गुन्हे दाखल झाल्याने परिसरात संमिश्र प्रतिक्रिया उमटत असून, आंदोलकांमध्ये संतापाचे वातावरण आहे.

• नरेश जी. कनोजे, सारथी महाराष्ट्राचा न्यूज, खापरखेडा (सावनेर तालुका प्रतिनिधी)