शासनाने तातडीने मदत देण्याची मागणी
त्र्यंबकेश्वर : प्रतिनिधी
खरीप हा एकमेव हंगाम आणि त्यात पिकवले जाणारे भात हे मुख्य पीक यंदा पावसाच्या अभावाने हिरावले गेले आहे. हरसूल परिसरात कापणीला आलेले भात पीक पावसाअभावी शेतातच जळून करपल्याने शेतकरी आणि शेतमजूर पूर्णपणे हवालदिल झाले आहेत. या अस्मानी संकटात सापडलेल्या शेतकऱ्यांना शासनाने तातडीने आर्थिक मदत देण्याची गरज निर्माण झाली आहे.
या गंभीर नुकसानीची वस्तुस्थिती जाणून घेण्यासाठी जिल्हा नियोजन समिती सदस्य विनायक माळेकर व युवा नेते मिथुन राऊत यांनी हरसूल भागातील बेलापाली येथे थेट शेतकऱ्यांच्या बांधावर जाऊन पिकांची प्रत्यक्ष पाहणी केली.
पाहणीदरम्यान कृषी विभागाचे अधिकारी अशोक कडूल यांनी तांत्रिक बाबींची माहिती दिली. यावेळी स्थानिक शेतकऱ्यांनी व्यथा मांडताना सांगितले की, “पाऊस न पडल्याने उभे पीक जळून खाक झाले असून, मजुरीचा खर्चही निघणे कठीण झाले आहे. अशा बिकट परिस्थितीत शासनाने आम्हाला वाऱ्यावर सोडू नये.”
यावर विनायक माळेकर व मिथुन राऊत यांनी प्रशासनाने तातडीने नुकसानीचे पंचनामे करून बाधित शेतकऱ्यांना लवकरात लवकर नुकसानभरपाई व दुष्काळी मदत जाहीर करावी, अशी मागणी केली आहे.
“शेतात कापणीला आलेले पीक उभे जळून करपून गेले आहे. त्याचा जनावरांना चारा म्हणूनही उपयोग उरलेला नाही. सोंगणीचा हंगाम वाया गेल्याने शेतमजुरांच्या हाताला काम उरलेले नाही. ही अत्यंत दयनीय अवस्था असून, शासनाने तातडीने मदत जाहीर करणे गरजेचे आहे.”
— विठ्ठल राऊत, युवा नेते, त्र्यंबकेश्वर
या पाहणीप्रसंगी हरसूल सोसायटीचे चेअरमन लक्ष्मण मेये, पोलीस पाटील सुनील पवार, रामदास घटक, विनायक मेये, मोहन लाडवन, रामदास गावित, राजेश मेये, प्रकाश तेलम यांच्यासह परिसरातील शेतकरी मोठ्या संख्येने उपस्थित होते.
