अंध विद्यार्थ्यांसाठी विकसित केले एआय आधारित तंत्रज्ञान…
श्रीगोंदा तालुक्यातील चांडगाव येथील न्यू इंग्लिश स्कूलची विद्यार्थिनी श्रद्धा रमेश लोंढे हिने अंध विद्यार्थ्यांच्या जीवनात चैतन्य निर्माण करण्यासाठी आणि त्यांच्या शिक्षणाला मदत व्हावी म्हणून कृत्रिम बुद्धिमत्तेवर (AI) आधारित ‘शिक्षक सहाय्यक उपकरण’ विकसित केले असून, या उपकरणाला देशात प्रथम क्रमांक मिळाला आहे. दिल्ली येथे झालेल्या भारत सरकारच्या राष्ट्रीय स्तरावरील इन्स्पायर अवॉर्ड स्पर्धेत अंध विद्यार्थ्यांचे वाचन सुलभ करणे आणि आवाजाद्वारे त्यांना मार्गदर्शन करणे या उद्देशाने तिने हे नाविन्यपूर्ण उपकरण सादर केले. विज्ञानाचे शिक्षक सुभाष गायकवाड यांच्या मार्गदर्शनाखाली तयार केलेल्या या उपकरणाच्या यशामुळे श्रद्धाची आता जपानमधील आंतरराष्ट्रीय इन्स्पायर अवॉर्ड स्पर्धेसाठी निवड झाली आहे. तिच्या या राष्ट्रीय यशाबद्दल आमदार रोहित पवार यांच्यासह विविध क्षेत्रातील मान्यवरांनी व गावकऱ्यांनी तिचे कौतुक केले आहे.
