पहाटे ४.२५ ते ५ वाजेदरम्यान चान्नी पोलिसांची कारवाई; महाराष्ट्र प्राणी संरक्षण कायद्यानुसार गुन्हा दाखल करण्याची प्रक्रिया सुरू
प्रतिनिधी
आलेगाव : येथील एका पत्र्याच्या शेडमध्ये गोवंशाची कत्तल सुरू असल्याच्या माहितीवरून चान्नी पोलिसांनी रविवारी (दि. १८) पहाटे छापा टाकला. या कारवाईदरम्यान दोघांना ताब्यात घेण्यात आले असून, कत्तलीसाठी बांधून ठेवलेल्या दोन जिवंत गायींची सुटका करण्यात आली. या प्रकरणी महाराष्ट्र प्राणी संरक्षण कायद्यानुसार गुन्हा दाखल करण्याची प्रक्रिया सुरू असल्याची माहिती पोलिसांनी दिली.
गोपनीय माहितीच्या आधारे कारवाई
पोलिसांनी दिलेल्या माहितीनुसार, आलेगाव येथील एका पत्र्याच्या शेडमध्ये गोवंशाची कत्तल सुरू असल्याची गोपनीय माहिती चान्नी पोलिसांना मिळाली होती. या माहितीच्या आधारे पोलिसांनी पहाटे ४.२५ ते ५ वाजेदरम्यान संबंधित ठिकाणी छापा टाकला. यावेळी तेथे गोवंशाची कत्तल सुरू असल्याचे निदर्शनास आल्याचे पोलिसांनी सांगितले.
या प्रकरणी शेख इब्राहिम शेख कळु आणि मोहम्मद हुजैफ शेख हसन (दोघेही रा. आलेगाव) यांना ताब्यात घेण्यात आले. घटनास्थळावरून दोन जिवंत गायी ताब्यात घेऊन त्यांची सुटका करण्यात आली.
वरिष्ठांच्या मार्गदर्शनाखाली पथकाची कारवाई
ही कारवाई पोलीस अधीक्षक अर्चित चांडक, अपर पोलीस अधीक्षक चंद्रकांत रेड्डी आणि उपविभागीय पोलीस अधिकारी गजानन पडघन यांच्या मार्गदर्शनाखाली करण्यात आली.
चान्नी पोलीस ठाण्याचे प्रभारी परिविक्षाधीन उपअधीक्षक धनराज देवजर्नकर यांच्या नेतृत्वाखालील पथकात पोलीस हवालदार रुपेश मोरे, राहुल वाघ, रवी घुगे तसेच पोलीस शिपाई शिवानंद स्वामी, शिवाजी आणि राम टेकाडे सहभागी होते.
या प्रकरणाचा पुढील तपास चान्नी पोलीस करीत आहेत.
