बारामती सत्र न्यायालयाचा निकाल; सहआरोपी सावत्र आईची निर्दोष मुक्तता, बचाव पक्षातर्फे ॲड. अमोल सोनवणे यांचा युक्तिवाद
बारामती | प्रतिनिधी
अल्पवयीन मुलीवर वारंवार लैंगिक अत्याचार करून तिला गर्भवती केल्याच्या प्रकरणात बारामती येथील अतिरिक्त जिल्हा व सत्र न्यायालयाने पीडितेच्या वडिलांना जन्मठेपेची शिक्षा सुनावली आहे. तसेच पीडितेला पाच लाख रुपये नुकसानभरपाई देण्याचे आदेश दिले आहेत. याच प्रकरणातील सहआरोपी सावत्र आईची न्यायालयाने निर्दोष मुक्तता केली. या खटल्यात आरोपी क्रमांक दोनच्या वतीने ॲड. अमोल सोनवणे यांनी बचाव पक्षाची बाजू मांडली.
वीटभट्टीवरील वास्तव्यातील घटना
या प्रकरणातील मुख्य आरोपी हा पीडितेचा वडील आहे. सन २०२२ मध्ये तो पीडिता आणि तिच्या सावत्र आईसह वीटभट्टीवर कामासाठी आला होता. २७ डिसेंबर २०२२ पासून वडिलांनी अल्पवयीन मुलीवर वारंवार लैंगिक अत्याचार केल्याचा तसेच याबाबत कोणाला सांगितल्यास जीवे मारण्याची धमकी दिल्याचा आरोप होता.
पीडिता गर्भवती असल्याचे समोर आल्यानंतर वीटभट्टी मालकाच्या पत्नीने तिच्या नातेवाईकांशी संपर्क साधून घटनेची माहिती दिली. त्यानंतर पीडितेला उपचारासाठी शासकीय रुग्णालयात दाखल करण्यात आले. या प्रकरणी दौंड पोलीस ठाण्यात गुन्हा दाखल करण्यात आला होता.
सावत्र आईविरुद्धही आरोप
तपासादरम्यान पीडितेने घडलेल्या प्रकाराची माहिती सावत्र आईला दिल्यानंतर तिनेही जीवे मारण्याची धमकी दिल्याचा आणि कथित गुन्ह्याला प्रोत्साहन दिल्याचा आरोप करण्यात आला होता. या आरोपांवरून पोलिसांनी सावत्र आईला अटक करून तिच्याविरुद्ध दोषारोपपत्र दाखल केले होते.
ॲड. अमोल सोनवणे यांच्याकडून बचावाची बाजू
आरोपी क्रमांक दोन अर्थात सावत्र आईच्या वतीने ॲड. अमोल सोनवणे यांनी न्यायालयात बचाव पक्षाची बाजू मांडली. साक्षीदारांच्या उलटतपासणीदरम्यान तिच्यावर करण्यात आलेल्या आरोपांचे स्वरूप, कथित भूमिका आणि उपलब्ध पुरावे यांची छाननी करण्यात आली.
प्रत्येक आरोपीविरुद्धचे आरोप स्वतंत्रपणे तपासून ते कायदेशीर पुराव्यांच्या आधारे सिद्ध होणे आवश्यक असल्याचा मुद्दा बचाव पक्षाने मांडला. लेखी व तोंडी युक्तिवाद तसेच साक्षीदारांच्या साक्षींच्या परीक्षणानंतर न्यायालयाने सावत्र आईची निर्दोष मुक्तता केली.
१२ साक्षीदारांची साक्ष; पीडितेला पाच लाखांची भरपाई
या खटल्यात एकूण १२ साक्षीदार तपासण्यात आले. उपलब्ध पुरावे आणि साक्षी विचारात घेऊन अतिरिक्त जिल्हा व सत्र न्यायाधीश एस. आर. पाटील यांनी मुख्य आरोपीला जन्मठेपेची शिक्षा सुनावली. याशिवाय पीडितेला पाच लाख रुपये नुकसानभरपाई देण्याचे आदेश दिले.
या खटल्यात ॲड. अमोल सोनवणे यांना सहकारी विधिज्ञ अविनाश जाधव, रितिक गायकवाड, राजरत्न ताकतोडे, वैभव झगडे, राहुल गिरमे, सागर खरात, ॲड. रवींद्र सोनवणे आणि लीगल एड पॅनेलचे ॲड. सुमित पाटील यांचे सहकार्य लाभले.
