आठ तालुक्यांतील संघांवर मात; विभागीय कबड्डी स्पर्धेसाठी संघाची पात्रता
खोडेगाव : स्वराज प्राथमिक व डॉ. टी. पी. पाटील माध्यमिक विद्यालय, खोडेगाव येथील मुलींच्या कबड्डी संघाने छत्रपती संभाजीनगर जिल्हास्तरीय कबड्डी स्पर्धेत उल्लेखनीय कामगिरी केली आहे. जिल्ह्यातील आठ तालुक्यांतील प्रतिस्पर्धी संघांवर मात करत संघाने प्रथम क्रमांक पटकावला असून, विभागीय स्पर्धेसाठी पात्रता मिळवली आहे.
या यशामुळे विद्यालयाच्या क्रीडा क्षेत्रातील कामगिरीत आणखी एक मानाचा तुरा रोवला गेला आहे. खेळाडूंची मेहनत, संघभावना, जिद्द आणि सातत्यपूर्ण सराव यांचे हे फलित असल्याची भावना व्यक्त होत आहे.
क्रीडा शिक्षकांचे मोलाचे मार्गदर्शन
या संघाला क्रीडा शिक्षक सतीश पर्हाड सर आणि गोकुळ ढुमसे सर यांचे मार्गदर्शन लाभले. त्यांच्या मार्गदर्शनाखाली खेळाडूंनी सराव करून स्पर्धेत उत्कृष्ट कामगिरी केली. आता विभागीय स्पर्धेतही चांगली कामगिरी करण्यासाठी संघ सज्ज झाला आहे.
विजयी संघाचे सर्वत्र अभिनंदन
या यशाबद्दल संस्थेचे संस्थापक महेश पाटील सर, उपाध्यक्ष अलकाताई पाटील, संचालक डॉ. नेहाताई भोईटे पाटील, संचालक डॉ. स्वराज पाटील, माध्यमिक विभागाचे मुख्याध्यापक बाळासाहेब सपकाळ सर आणि प्राथमिक विभागाचे मुख्याध्यापक भागवत दिवटे सर यांनी विजयी खेळाडूंचे तसेच मार्गदर्शक शिक्षकांचे अभिनंदन केले.
विद्यालयातील सर्व शिक्षक आणि शिक्षकेतर कर्मचाऱ्यांनीही संघाचे कौतुक केले. मुलींच्या या यशामुळे शाळेच्या क्रीडा क्षेत्रातील नावलौकिकात भर पडली असून, विभागीय स्पर्धेसाठी खेळाडूंना शुभेच्छा देण्यात आल्या.
