जत प्रतिनिधी: अरुण कोळी
जत तालुक्यातील भूजलपातळी वाढवून भविष्यातील दुष्काळावर कायमस्वरूपी उपाययोजना करण्यासाठी जलतारा, रेन वॉटर हार्वेस्टिंग आणि शिरपूर पॅटर्न या जलसंधारणाच्या मोहिमा प्रभावीपणे राबवाव्यात, अशी मागणी शिवसेना (उद्धव बाळासाहेब ठाकरे) गटाचे युवा तालुकाध्यक्ष अमित दुधाळ यांनी केली आहे.
जत तालुक्यात २०२५ मध्ये अतिवृष्टीमुळे शेतकऱ्यांचे मोठे नुकसान झाले होते. मात्र, २०२६ मध्ये पावसाअभावी भीषण दुष्काळसदृश परिस्थिती निर्माण झाली आहे. भूजलपातळी खालावल्याने शेतीसह पिण्याच्या पाण्याचा प्रश्नही गंभीर बनला आहे. त्यामुळे भविष्यात अशा परिस्थितीची पुनरावृत्ती टाळण्यासाठी आतापासूनच ठोस जलसंधारणाच्या उपाययोजना करणे आवश्यक असल्याचे दुधाळ यांनी म्हटले आहे.
जत तालुक्यात ‘पाणी अडवा, पाणी जिरवा’ ही मोहीम व्यापक स्वरूपात राबवून शेतकऱ्यांना केंद्रस्थानी ठेवावे. रोजगार हमी योजना व अन्य शासकीय योजनांच्या माध्यमातून जलसंधारणाची कामे हाती घ्यावीत. जलतारा, रेन वॉटर हार्वेस्टिंग आणि शिरपूर पॅटर्नच्या माध्यमातून पावसाचे पाणी जमिनीत खोलवर मुरवता येईल. त्यामुळे भूजलपातळीत वाढ होऊन विहिरी, कूपनलिका आणि अन्य जलस्रोतांना फायदा होऊ शकतो.
शासकीय यंत्रणा, स्थानिक स्वराज्य संस्था आणि लोकसहभागातून ही संकल्पना प्रभावीपणे राबविल्यास जत तालुका दुष्काळमुक्त करण्याच्या दिशेने महत्त्वाचे पाऊल पडेल. या मोहिमेसाठी शिवसेना उबाठा गटाकडूनही आवश्यक सहकार्य करण्यात येईल. प्रशासनाने या मागणीची गंभीरपणे दखल घेऊन जलसंधारणाची कामे तातडीने सुरू करावीत, असे आवाहन अमित दुधाळ यांनी केले आहे.
