दीक्षाभूमीच्या ऐतिहासिक महत्त्वासह बुद्ध, फुले, शाहू आणि आंबेडकरांच्या परिवर्तनवादी विचारांचा कवितेतून जागर

अमरावती | सारथी महाराष्ट्राचा न्यूज

दि. २० ऑक्टोबर २०२६ रोजी असलेल्या अशोक विजयादशमीच्या निमित्ताने डॉ. बाबासाहेब आंबेडकर राज्यस्तरीय समाजसेवा गौरव पुरस्कार प्राप्त साहित्यिक व कवी प्रा. अरुण बाबारावजी बुंदेले यांची ‘दीक्षाभूमी एक क्रांतिभूमी’ ही मुक्तछंदातील कविता वाचकांसाठी प्रकाशित करण्यात येत आहे.

नागपूर येथील दीक्षाभूमीचे ऐतिहासिक महत्त्व, डॉ. बाबासाहेब आंबेडकर यांनी दिलेली धम्मदीक्षा आणि त्यातून समाजात निर्माण झालेल्या परिवर्तनाच्या प्रेरणेचे दर्शन या कवितेतून घडते. शोषित-वंचित समाजाला स्वाभिमान, समानता आणि मानवी हक्कांची जाणीव करून देणाऱ्या विचारांचा प्रभावी आविष्कार या कवितेत करण्यात आला आहे.

दीक्षाभूमी ही केवळ एक ऐतिहासिक वास्तू नसून ती सामाजिक परिवर्तनाची प्रेरणाभूमी असल्याची भावना कवीने शब्दबद्ध केली आहे. बुद्ध, फुले, शाहू आणि आंबेडकर यांच्या विचारांचा वारसा पुढे नेण्याचे महत्त्व अधोरेखित करताना स्वातंत्र्य, समता, बंधुता आणि न्याय या मूल्यांचा संदेश कवितेतून देण्यात आला आहे.

कविता : ‘दीक्षाभूमी एक क्रांतिभूमी’

नागपूरच्या दीक्षाभूमीवर
घडते तथागत गौतम बुद्ध
आणि संविधानाचे शिल्पकार
विश्वरत्न डॉ. बाबासाहेब
आंबेडकर यांचे दर्शन

नागपूरच्या या दीक्षाभूमीवर
बाबासाहेबांनी लाखो अनुयायांना
बुद्ध धम्माची दीक्षा देऊन
इतिहास एका रात्रीत बदलला
शोषितांच्या जीवनातील तिमिराला
एक नवा प्रकाशमार्ग लाभला

ती फक्त एक जागा नाही,
ती तर एक महान क्रांतिभूमी आहे
शतकानुशतके सहन केलेल्या
वेदनेचा हुंकार आहे

बाबासाहेबांच्या धर्मांतराने
गुलामीच्या बेड्या क्षणात तुटल्या,
मानवतेचा महामंत्र सांगत,
धम्माच्या पाऊलखुणा येथेच उमटल्या.

जयभीमची गर्जना देत
दीक्षाभूमीवर येतो प्रत्येक बांधव
नवे परिवर्तनवादी बाबासाहेबांचे
विचार मनात रुजवायला

दीक्षाभूमीची ही पवित्र माती
शिकविते हक्कासाठी लढायला

थोरांच्या विचारांच्या पुस्तकांची
यात्रा म्हणजे दीक्षाभूमी
येथे आलेला प्रत्येक बांधव
फक्त ग्रंथ खरेदी करीत नाही
तर बुद्ध-फुले-शाहू-आंबेडकरांचा
क्रांतिकारी विचारही घेऊन जातो सोबत
स्वतःच्या शहर नि ग्रामामध्ये
परिवर्तनवादी विचार पेरायला

दीक्षाभूमी हीच खरी प्रेरणा
माणसाला माणूस म्हणून जगण्याची
स्वातंत्र्य, समता, बंधुता नि न्यायाची

तथागत गौतम बुद्धाला
करितो मी वंदन ॥
विश्वरत्न डॉ. बाबासाहेब आंबेडकरांना
करितो अभिवादन ॥

कवी परिचय :

प्रा. अरुण बाबारावजी बुंदेले
डॉ. बाबासाहेब आंबेडकर राज्यस्तरीय साहित्यरत्न पुरस्कार प्राप्त साहित्यिक व कवी
काँग्रेस नगर, अमरावती.

संपर्क : ८०८७७४८६०९

सारथी महाराष्ट्राचा न्यूज