आढेगाव | प्रतिनिधी
आढेगाव ते टाकळी या रस्त्याची दुरवस्था झाली असून, रस्ता उखडल्यामुळे शाळकरी मुलांसह ग्रामस्थ आणि वाहनचालकांना मोठ्या अडचणींचा सामना करावा लागत आहे. या समस्येमुळे नागरिकांमधून नाराजी व्यक्त होत असून, रस्त्याची तातडीने दुरुस्ती करण्याची मागणी होत आहे.
या मार्गावरून दररोज शाळकरी मुले ये-जा करतात. मात्र, रस्त्याची खराब अवस्था असल्याने विद्यार्थ्यांच्या सुरक्षित प्रवासाचा प्रश्न निर्माण झाला आहे. तसेच दुचाकीस्वार, शेतकरी आणि इतर वाहनचालकांनाही या रस्त्यावरून प्रवास करताना त्रास सहन करावा लागत आहे.
रस्त्याची दुरवस्था लक्षात घेता, आढेगावचे सरपंच कांतीलाल टेळे व इतर सर्व ग्रामस्थांनी संबंधित प्रशासनाने तातडीने दखल घेऊन रस्त्याची पाहणी करावी आणि दुरुस्तीचे काम लवकरात लवकर सुरू करावे, अशी मागणी केली आहे.
ग्रामीण भागातील दळणवळणासाठी महत्त्वाच्या असलेल्या या रस्त्याची तातडीने दुरुस्ती करून शाळकरी मुलांसह सर्व नागरिकांचा प्रवास सुरक्षित व सुलभ करावा, अशी अपेक्षा ग्रामस्थांकडून व्यक्त होत आहे.
आता संबंधित प्रशासन या मागणीची दखल घेऊन रस्त्याच्या दुरुस्तीसाठी काय पावले उचलते, याकडे आढेगाव ग्रामस्थांचे लक्ष लागले आहे.
