‘मिशन आपुलकी’ उपक्रमांतर्गत सामाजिक बांधिलकीचा प्रेरणादायी आदर्श..!
जामखेड (प्रतिनिधी): वाढदिवस साजरा करण्याच्या पारंपरिक पद्धतीला सामाजिक बांधिलकीची जोड देत सारोळा येथील जिल्हा परिषद प्राथमिक शाळेतील इयत्ता पहिलीचा विद्यार्थी चि. शौनक राहुल लिमकर याच्या वाढदिवसानिमित्त त्याच्या कुटुंबीयांनी शाळेला 1500 रूपयांच्या किमतीचा ताशा भेट दिला. या उपक्रमातून लिमकर कुटुंबीयांनी सामाजिक बांधिलकी जपत शाळेच्या विकासासाठी मोलाचे योगदान दिले आहे.
शाळेच्या गरजा लक्षात घेऊन विद्यार्थ्यांच्या शैक्षणिक व सांस्कृतिक विकासासाठी उपयुक्त ठरणारी ही भेट ‘मिशन आपुलकी’ या उपक्रमांतर्गत देण्यात आली. या योगदानाबद्दल शाळेच्या वतीने श्री. राहुल बब्रुवान लिमकर सर यांचा सन्मान करण्यात आला.
विद्यार्थ्यांच्या सर्वांगीण विकासासाठी शिक्षकांसोबतच पालक आणि समाजाचे सहकार्यही महत्त्वाचे असते. वाढदिवसासारख्या आनंदाच्या प्रसंगी शाळेला उपयुक्त वस्तू भेट देऊन लिमकर कुटुंबीयांनी समाजापुढे एक प्रेरणादायी आदर्श ठेवला आहे.
वाढदिवसाचा आनंद केवळ वैयक्तिक उत्सवापुरता मर्यादित न ठेवता शाळेच्या प्रगतीसाठी हातभार लावण्याचा हा उपक्रम कौतुकास्पद ठरत आहे. या स्तुत्य उपक्रमाबद्दल शाळेच्या वतीने लिमकर कुटुंबीयांचे आभार व्यक्त करण्यात आले, तसेच चि. शौनक याला वाढदिवसाच्या शुभेच्छा देण्यात आल्या.
या कार्यक्रम प्रसंगी ग्रेड मुख्याध्यापक संदीप भालसिंग, पदवीधर शिक्षक सुरेश बर्वे, राहुल लिमकर, अर्चना त्रिमुखे, उपाध्यापक प्रशांत होळकर, उपाध्यापिका शबाना शेख,वृषाली खांदवे, अमृता रसाळ यांच्यासह शाळेतील विद्यार्थी उपस्थित होते.
