प्रतिमा, पोथी आणि विणाच्या मिरवणुकीने उत्सवाचा प्रारंभ; साईभक्तांची मोठी उपस्थिती
शिर्डी, प्रतिनिधी :
श्री साईबाबांच्या पुण्यतिथी उत्सवानिमित्त शिर्डीत भक्तिमय वातावरण निर्माण झाले असून, उत्सवाच्या पहिल्या दिवशी श्री साईबाबांची प्रतिमा, पोथी आणि वीणा यांची मिरवणूक काढण्यात आली. या मिरवणुकीत श्री साईबाबा संस्थानचे अधिकारी, मंदिरातील पुजारी, शिर्डी ग्रामस्थ आणि साईभक्त मोठ्या संख्येने सहभागी झाले.
या वेळी संस्थानचे मुख्य कार्यकारी अधिकारी गोरक्ष गाडीलकर यांनी वीणा, उपमुख्य कार्यकारी अधिकारी भीमराज दराडे यांनी पोथी, तर प्रशासकीय अधिकारी संदीपकुमार भोसले आणि मंदिर विभागप्रमुख विष्णू थोरात यांनी श्री साईबाबांची प्रतिमा घेऊन मिरवणुकीत सहभाग घेतला.
यावेळी संस्थानचे प्रशासकीय अधिकारी अविनाश कुलकर्णी, संरक्षण अधिकारी रोहिदास माळी, प्रभारी जनसंपर्क अधिकारी दीपक लोखंडे, मंदिरातील पुजारी, शिर्डी ग्रामस्थ आणि साईभक्त उपस्थित होते.
श्री साईबाबांच्या पुण्यतिथी उत्सवानिमित्त शिर्डीत भक्तिमय वातावरण अनुभवायला मिळत असून, विविध धार्मिक कार्यक्रमांमुळे साईभक्तांमध्ये उत्साहाचे वातावरण आहे.
