नवरात्रोत्सवातील अष्टमीला श्री रेणुकामाता सुवर्ण मंदिरात भाविकांची अलोट गर्दी
छत्रपती संभाजीनगर, प्रतिनिधी : राजस्थानचे राज्यपाल हरिभाऊ बागडे यांनी रविवारी श्री रेणुकामाता सुवर्ण मंदिराला भेट देऊन रेणुकामातेचे दर्शन घेतले. यावेळी त्यांच्या हस्ते देवीची आरती करण्यात आली. नवरात्रोत्सवातील अष्टमीच्या पर्वानिमित्त मंदिरात दर्शनासाठी भाविकांची मोठी गर्दी झाली होती.
मंदिर विश्वस्त मंडळाचे अध्यक्ष सतीश वैद्य यांनी राज्यपाल हरिभाऊ बागडे यांचा विशेष सत्कार केला. यावेळी त्यांनी मंदिराच्या प्रगतीचा आढावा घेत मंदिराच्या वतीने उभारण्यात येत असलेल्या सामाजिक संकुलाच्या कार्याची सविस्तर माहिती दिली. राज्यपालांनी या उपक्रमाची माहिती जाणून घेतली तसेच भविष्यात राबविण्यात येणाऱ्या विविध सामाजिक व सांस्कृतिक उपक्रमांसाठी मौलिक सूचना केल्या.
नवरात्रोत्सवानिमित्त मंदिरात दररोज आयोजित करण्यात येणाऱ्या सांस्कृतिक कार्यक्रमांचे आणि त्यासाठी करण्यात आलेल्या नियोजनाचे राज्यपालांनी कौतुक केले. उत्सवाचे उत्तम आयोजन केल्याबद्दल त्यांनी मंदिर विश्वस्त मंडळाचे अभिनंदन केले.
यावेळी विश्वस्त मंडळाचे पदाधिकारी प्रशांत नांदेडकर, सुनील खोचे, जगन्नाथ उगले, मकरंद पुराणिक आदी उपस्थित होते. अष्टमीच्या निमित्ताने रेणुकामातेच्या दर्शनासाठी भाविकांनी मोठ्या संख्येने उपस्थिती लावली. संपूर्ण मंदिर परिसर भक्तिमय वातावरणाने भारावून गेला होता.
