घोष पथकाच्या तालावर स्वयंसेवकांचे शिस्तबद्ध संचलन; पंच परिवर्तनाचा संदेश देत सामाजिक बांधिलकी जपण्याचे आवाहन
लासलगाव | प्रतिनिधी
लासलगाव येथे मंगळवार, दिनांक २० ऑक्टोबर २०२६ रोजी राष्ट्रीय स्वयंसेवक संघाच्या विजयादशमी उत्सवानिमित्त भव्य पथसंचलन आणि पारंपरिक शस्त्रपूजन सोहळा उत्साहात संपन्न झाला. या कार्यक्रमात स्वयंसेवकांनी पूर्ण गणवेशात शिस्तबद्ध पद्धतीने सहभाग घेतला. घोष पथकाच्या तालावर निघालेल्या पथसंचलनाने शहरवासीयांचे लक्ष वेधून घेतले.
विजयादशमीनिमित्त आयोजित कार्यक्रमात परंपरेनुसार शस्त्रांचे विधिवत पूजन करण्यात आले. यावेळी नाशिक जिल्हा ग्रामीणचे सहकार्यवाह प्रशांत आहेर आणि संघाचे विमर्श संयोजक जयेश क्षेमकल्याणी यांच्यासह विविध क्षेत्रांतील मान्यवर उपस्थित होते.
यानंतर लासलगाव ग्रामपंचायत कार्यालयाच्या प्रांगणातून पथसंचलनाला सुरुवात झाली. ओहोळ भाग, आरजे मॉल, बसस्थानक, डॉ. बाबासाहेब आंबेडकर रोड, लासलगाव पोलीस ठाण्यासमोरील बाजारतळ, महादेव मंदिर, इच्छापूर्ती गणपती मंदिर, अहिल्यादेवी किल्ल्याच्या मागील परिसर, पाटील गल्ली, छत्रपती शिवाजी महाराज चौक आणि प्रभू श्रीराम त्रिफुली कोटमगाव रोड या मार्गांवरून संचलन मार्गक्रमण करत कृषी उत्पन्न बाजार समितीतील भगरी बाबा मंदिर येथे त्याची सांगता झाली.
हातात दंड, अंगावर पूर्ण गणवेश आणि शिस्तबद्ध पद्धतीने चालणारे स्वयंसेवक हे पथसंचलनाचे वैशिष्ट्य ठरले. संचलनाच्या मार्गावर स्थानिक नागरिकांनी, विशेषतः महिलांनी आकर्षक रांगोळ्या काढून तसेच पुष्पवृष्टी करून स्वयंसेवकांचे स्वागत केले.
पंच परिवर्तनाचा संदेश
कार्यक्रमादरम्यान नाशिक जिल्हा ग्रामीणचे सहकार्यवाह प्रशांत आहेर यांनी स्वयंसेवकांना मार्गदर्शन केले. राष्ट्रीय एकात्मता, कुटुंबप्रबोधन, पर्यावरण रक्षण, सामाजिक समरसता आणि ग्रामविकास या पंच परिवर्तनाच्या विषयांवर त्यांनी विशेष भर दिला. समाजातील प्रत्येक घटकाने सहभाग नोंदवून सामाजिक बांधिलकी जपत राष्ट्रनिर्मितीच्या कार्यात योगदान द्यावे, असे आवाहन यावेळी करण्यात आले.
पारंपरिक शस्त्रपूजन, शिस्तबद्ध पथसंचलन आणि पंच परिवर्तनाचा संदेश यांमुळे लासलगावमधील विजयादशमी उत्सव उत्साहपूर्ण वातावरणात पार पडला.
