विद्यार्थ्यांचा वाचन उपक्रमात उत्स्फूर्त सहभाग; वाचनाचे महत्त्व अधोरेखित
पिंपळखुटा मोठा | प्रतिनिधी
पिंपळखुटा मोठा येथील श्री विवेकानंद विद्यामंदिरात भारतरत्न, माजी राष्ट्रपती आणि थोर शास्त्रज्ञ डॉ. ए. पी. जे. अब्दुल कलाम यांच्या जयंतीनिमित्त वाचन दिन उत्साहात साजरा करण्यात आला. विद्यार्थ्यांमध्ये वाचनाची आवड निर्माण व्हावी आणि वाचनसंस्कृती रुजावी, या उद्देशाने आयोजित करण्यात आलेल्या या कार्यक्रमाला उत्स्फूर्त प्रतिसाद मिळाला. कार्यक्रमाच्या अध्यक्षस्थानी वाळके सर होते.
यावेळी ज्योती मंगरुळकर, संजय बागडे, ज्योती वानखडे आणि प्रीती भुजाडे यांची प्रमुख उपस्थिती होती. विद्यार्थ्यांनी वाचन उपक्रमात उत्स्फूर्त सहभाग नोंदवत वाचनाची गोडी जोपासण्याचा संदेश दिला.
कार्यक्रमादरम्यान ज्योती मंगरुळकर यांनी मार्गदर्शनपर भाषणातून वाचनाचे महत्त्व स्पष्ट केले. वाचनामुळे विद्यार्थ्यांच्या ज्ञानात भर पडते, विचारशक्ती विकसित होते आणि व्यक्तिमत्त्व विकासाला चालना मिळते. विद्यार्थ्यांनी नियमित वाचनाची सवय लावून ज्ञानाची व्याप्ती वाढवावी, असे त्यांनी सांगितले.
कार्यक्रमाचे सूत्रसंचालन विद्यार्थिनी स्नेहल खातरकर हिने केले, तर प्राची माहुलकर हिने आभार प्रदर्शन केले. कार्यक्रमाच्या यशस्वितेसाठी मुख्याध्यापक अमोल तटे यांचे विशेष मार्गदर्शन लाभले.
विद्यार्थ्यांमध्ये वाचनसंस्कृती रुजविणे, ज्ञानाची आवड निर्माण करणे आणि वाचनाच्या माध्यमातून व्यक्तिमत्त्व विकासाला प्रोत्साहन देणे, हा या उपक्रमाचा मुख्य उद्देश होता. उत्साहपूर्ण वातावरणात कार्यक्रमाची सांगता झाली.
