चाफेरी बौद्धवाडी येथील सिद्धार्थ लक्ष्मण पवार बेपत्ता; माहिती मिळाल्यास जयगड सागरी पोलीस ठाण्याशी संपर्क साधण्याचे आवाहन
रत्नागिरी | प्रतिनिधी
रत्नागिरी जिल्ह्यातील जयगड सागरी पोलीस ठाण्याच्या हद्दीतील चाफेरी बौद्धवाडी येथील सिद्धार्थ लक्ष्मण पवार (वय ६५) यांच्या अपहरणप्रकरणी पोलिसांनी शोधमोहीम सुरू केली आहे. याप्रकरणी जयगड सागरी पोलीस ठाण्यात गुन्हा रजिस्टर क्रमांक ७६/२०२६ अन्वये भारतीय न्याय संहितेच्या कलम १४०(३) अंतर्गत गुन्हा दाखल करण्यात आला आहे. या प्रकरणाचा तपास पोलीस उपनिरीक्षक सुनील सावंत करीत आहेत.
पोलिसांनी दिलेल्या माहितीनुसार, सिद्धार्थ पवार हे चाफेरी बौद्धवाडी परिसरात फेरफटका मारत असताना अज्ञात व्यक्तीने अज्ञात कारणावरून त्यांचे अपहरण केल्याची फिर्याद दाखल करण्यात आली आहे. या तक्रारीच्या आधारे पोलिसांकडून त्यांचा शोध घेतला जात आहे.
बेपत्ता व्यक्तीचे वर्णन
सिद्धार्थ लक्ष्मण पवार यांचा रंग सावळा असून उंची सुमारे पाच फूट तीन इंच आहे. त्यांचे केस पांढरे व बारीक कापलेले असून दाढीही पांढरी आहे. त्यांच्या उजव्या गालावर मांसाची गाठ आहे. बेपत्ता होताना त्यांनी राखाडी रंगाचा अर्ध्या बाह्यांचा टी-शर्ट आणि पिवळ्या रंगाची अर्धी पँट परिधान केली होती. त्यांच्या कमरेला पंचरंगी दोरा असून त्यामध्ये हिरव्या रंगाचा ताईत बांधलेला होता. त्यांच्या पायात चप्पल होती.
माहिती मिळाल्यास पोलिसांना कळवा
सिद्धार्थ लक्ष्मण पवार कुठेही आढळून आल्यास किंवा त्यांच्याबाबत कोणतीही माहिती मिळाल्यास नागरिकांनी तातडीने जयगड सागरी पोलीस ठाण्याशी ८७८८९५२९८३ या क्रमांकावर संपर्क साधावा, असे आवाहन पोलिसांकडून करण्यात आले आहे. त्यांच्या शोधासाठी नागरिकांनी सहकार्य करावे, असेही आवाहन करण्यात आले आहे.
