सातपुडा साखर कारखान्याच्या गळीत हंगामाचा शुभारंभ; जुन्या कारखान्याचा उपपदार्थ प्रकल्प पुन्हा सुरू करण्याचे नियोजन
शहादा, दि. २३ (का. प्र.) : तालुक्यातील पुरुषोत्तमनगर येथे ओंकार शुगर अँड अलाईड लिमिटेड (सातपुडा साखर कारखाना) यांच्या गळीत हंगामाचा शुभारंभ बॉयलर अग्निप्रदीपन आणि मोळीपूजनाने उत्साहात पार पडला. यावेळी ऊस उत्पादक शेतकऱ्यांना गतहंगामासाठी प्रतिटन ३,०५० रुपये दर देण्यात येणार असून, दिवाळीनिमित्त २५ ऑक्टोबरपासून ऊस उत्पादकांना मोफत साखर वाटप सुरू करण्यात येईल, अशी घोषणा ओंकार ग्रुपचे चेअरमन बाबुराव बोत्रे पाटील यांनी केली. चालू हंगामातही जिल्ह्यातील सर्वाधिक दर देण्याचा प्रयत्न राहील, असे त्यांनी सांगितले.
कार्यक्रमाच्या अध्यक्षस्थानी पूज्य साने गुरुजी विद्या प्रसारक मंडळाचे अध्यक्ष दीपकभाई पुरुषोत्तम पाटील होते. यावेळी आमदार राजेश पाडवी, माजी जिल्हा परिषद सदस्या जयश्रीताई दीपक पाटील, नगरपरिषदेच्या उपाध्यक्षा माधवीताई मकरंद पाटील, पुरुषोत्तमनगरच्या सरपंच कोकिळाताई अशोक पाटील, समूहाच्या मुख्य कार्यकारी अधिकारी तेजस्विनी बर्गे, परिसरातील सरपंच, उपसरपंच, विविध संस्थांचे पदाधिकारी, शेतकरी आणि कामगार मोठ्या संख्येने उपस्थित होते.
प्रतिटन ३,०५० रुपये दर; मोफत साखर वाटप
शेतकऱ्यांना मार्गदर्शन करताना बाबुराव बोत्रे पाटील यांनी सांगितले की, गतहंगामात प्रतिटन २,९५० रुपये दर देण्यात आला होता. त्यात दिवाळीनिमित्त प्रतिटन १०० रुपयांची भर घालण्यात येणार असून, ही अतिरिक्त रक्कम २५ ऑक्टोबरनंतर शेतकऱ्यांच्या खात्यात जमा केली जाईल. त्यामुळे एकूण दर प्रतिटन ३,०५० रुपये होईल. याशिवाय प्रत्येक ऊस उत्पादक शेतकऱ्याला दिवाळीनिमित्त मोफत साखर दिली जाणार आहे. साखरेच्या बाजारमूल्याचाही विचार केल्यास शेतकऱ्यांना मिळणारा एकूण लाभ प्रतिटन सुमारे ३,१०० रुपयांपेक्षा अधिक ठरत असल्याचा दावा व्यवस्थापनाने केला.
कारखान्याच्या आर्थिक अडचणी दूर झाल्याचा दावा
कारखान्यावर पूर्वी सुमारे २,२०० कोटी रुपयांचे कर्ज होते. अध्यक्ष दीपकभाई पाटील यांच्या प्रयत्नांमुळे आणि राज्य शासनाच्या सहकार्यामुळे सुमारे तीन महिन्यांपूर्वी हे प्रकरण १२० कोटी रुपयांत सामोपचाराने मिटवण्यात यश आल्याचे व्यवस्थापनाने सांगितले. त्यामुळे कारखाना आर्थिक आणि कायदेशीर अडचणींतून बाहेर पडण्यास मदत झाल्याचेही स्पष्ट करण्यात आले.
बंद असलेला जुना सातपुडा साखर कारखाना आणि उपपदार्थ प्रकल्प पुढील तीन ते चार महिन्यांत सुमारे १० कोटी रुपये खर्च करून पुन्हा कार्यान्वित करण्याचे नियोजन असल्याची माहिती यावेळी देण्यात आली.
कामगारांना २० टक्के पगारवाढ
कामगारांच्या हितासाठी गेल्या दोन महिन्यांपूर्वी सर्व कर्मचाऱ्यांना २० टक्के पगारवाढ लागू करण्यात आल्याचे व्यवस्थापनाने सांगितले. मागील हंगामात तांत्रिक अडचणींमुळे ऊस बिलांच्या देयकांना काही काळ विलंब झाला होता. त्याबद्दल व्यवस्थापनाने दिलगिरी व्यक्त करत चालू हंगामात शेतकऱ्यांची बिले वेळेत अदा करण्याची ग्वाही दिली. तसेच सोशल मीडियावर कारखान्याबाबत प्रसारित होणाऱ्या दिशाभूल करणाऱ्या व्हिडिओ आणि क्लिप्सवर विश्वास ठेवण्यापूर्वी त्यांची सत्यता पडताळून पाहावी, असे आवाहन करण्यात आले.
जुन्या सभासदांच्या ठेवी परत करण्याची ग्वाही
अध्यक्षीय मनोगतात दीपकभाई पाटील यांनी कारखान्याकडे ठेवी असलेल्या सभासदांना तसेच कारखान्याकडून रक्कम येणे बाकी असलेल्या व्यक्तींना त्यांची रक्कम १०० टक्के अदा केली जाईल, असे आश्वासन दिले. शेतकरी हा कारखान्याचा कणा असून कारखान्याची प्रगती झाल्यास परिसराच्या विकासालाही चालना मिळेल, असे त्यांनी नमूद केले.
ओंकार ग्रुपच्या उद्योगविस्ताराची माहिती देताना समूहाकडे देशभरात ३४ साखर कारखाने, २३८ केएलपीडी क्षमतेची डिस्टिलरी आणि २६० मेगावॅट वीज निर्मिती क्षमता असल्याचे सांगण्यात आले. समूहाशी ३१ हजार कर्मचा
