ॲड. बाळासाहेब आंबेडकर यांच्या हस्ते ट्रॉफी प्रदान; महिला व पुरुष खेळाडूंच्या चित्तथरारक सादरीकरणाला उपस्थितांची दाद
पातूर | प्रतिनिधी
पातूर : भारतीय बौद्ध महासभा, अकोला यांच्या वतीने आयोजित धम्म मेळाव्यात पातूर येथील भीमशक्ती व्यायामशाळेच्या खेळाडूंनी लाठी-काठी प्रात्यक्षिकात प्रथम क्रमांक पटकावला. या उल्लेखनीय यशाबद्दल धम्म मेळाव्याचे प्रमुख मार्गदर्शक ॲड. बाळासाहेब आंबेडकर यांच्या हस्ते व्यायामशाळेच्या पथकाला प्रथम क्रमांकाची ट्रॉफी प्रदान करून गौरविण्यात आले.
वस्ताद मंगेश डोंगरे यांच्या मार्गदर्शनाखाली खेळाडूंनी लाठी-काठी कलेची प्रभावी प्रात्यक्षिके सादर केली. या सादरीकरणातून खेळाडूंनी साहस, आत्मविश्वास, शिस्त आणि जिद्दीचे दर्शन घडविले. महिला व पुरुष खेळाडूंनी उत्स्फूर्त सहभाग नोंदवत आपल्या कौशल्याने उपस्थितांची मने जिंकली.
या प्रात्यक्षिकात माजी वस्ताद प्रवीण बोरकर, प्रवीण पोहरे, मंगल डोंगरे, सतीश सुरवाडे, सूरज उपर्वट, शुभम धाडसे, महेश सुरवाडे, मंगल सरदार, धमदीप सुरवाडे आणि बंटी बोरकर यांनी सहभाग घेतला. तसेच महिला खेळाडू पूजा सुनील धाडसे, रीना गवई, आरुषी किरण सुरवाडे आणि पूजा दिलीप डोंगरे यांनीही लाठी-काठी कलेचे सादरीकरण करून उपस्थितांकडून कौतुकाची थाप मिळवली.
भीमशक्ती व्यायामशाळेच्या या यशामुळे पातूरच्या शिरपेचात मानाचा तुरा रोवला गेला आहे. खेळाडूंच्या मेहनतीचे, शिस्तीचे आणि उत्कृष्ट कामगिरीचे सर्व स्तरांतून कौतुक होत आहे.
