कथित ‘वोट चोरी’विरोधात आंदोलन; वनपट्टे, शेतकरी कर्जमाफी आणि स्थानिक तरुणांच्या रोजगाराचा प्रश्नही ऐरणीवर
शहादा, दि. २३ (प्रतिनिधी) : कथित ‘वोट चोरी’च्या विरोधात तसेच मुख्य निवडणूक आयुक्त ज्ञानेश कुमार यांच्या राजीनाम्याच्या मागणीसाठी नंदुरबार जिल्ह्यातील शहादा शहरात काँग्रेस पक्षाच्या वतीने गुरुवारी भव्य ‘जनआक्रोश मोर्चा’ काढण्यात आला. या मोर्चात काँग्रेसचे वरिष्ठ पदाधिकारी, माजी मंत्री, खासदार, पक्षाचे कार्यकर्ते आणि हजारो नागरिक सहभागी झाले होते.
शहरातील महात्मा फुले स्मारकाला अभिवादन करून मोर्चाला सुरुवात झाली. हातात काँग्रेसचे तिरंगी झेंडे आणि विविध मागण्यांचे फलक घेऊन सहभागी कार्यकर्त्यांनी सरकार व प्रशासनाच्या विरोधात जोरदार घोषणाबाजी केली. शहरातील प्रमुख मार्गावरून डॉ. बाबासाहेब आंबेडकर स्मारकमार्गे हा मोर्चा प्रांत कार्यालयावर धडकला. यावेळी परिसर घोषणांनी दुमदुमून गेला होता.
प्रांत कार्यालयासमोर झालेल्या सभेत काँग्रेसच्या प्रमुख नेत्यांनी सरकारच्या धोरणांवर टीका केली. त्यानंतर विविध मागण्यांचे निवेदन उपविभागीय अधिकाऱ्यांमार्फत प्रशासनाला सादर करण्यात आले.
मोर्चादरम्यान काँग्रेस नेत्यांनी देशात आणि राज्यात लोकशाही व निवडणूक प्रक्रियेच्या पारदर्शकतेबाबत प्रश्न उपस्थित केले. कथित ‘वोट चोरी’च्या प्रकरणांची दखल घेऊन मुख्य निवडणूक आयुक्त ज्ञानेश कुमार यांनी नैतिक जबाबदारी स्वीकारत तातडीने राजीनामा द्यावा, अशी मागणी त्यांनी केली.
याशिवाय नंदुरबार जिल्ह्यातील नागरिक, शेतकरी आणि कष्टकऱ्यांच्या प्रश्नांकडेही सरकारचे लक्ष वेधण्यात आले. वर्षानुवर्षे जल, जंगल आणि जमिनीवर हक्क असलेल्या वनपट्टेधारकांना अधिकृत वनपट्टे तातडीने देण्यात यावेत, नैसर्गिक आपत्ती व दुष्काळामुळे संकटात सापडलेल्या शेतकऱ्यांना नुकसानभरपाई देऊन सरसकट कर्जमाफी करावी, तसेच जिल्ह्यातील स्थानिक तरुणांना रोजगाराच्या संधी उपलब्ध करून त्यांचे स्थलांतर थांबवावे, अशा प्रमुख मागण्या निवेदनातून करण्यात आल्या.
“लोकशाहीचे रक्षण आणि नागरिकांच्या हक्कांसाठी काँग्रेस सनदशीर मार्गाने लढा देत राहील. सरकारने मागण्यांकडे दुर्लक्ष केल्यास यापुढे आणखी तीव्र आणि व्यापक आंदोलन उभारण्यात येईल,” असा इशारा काँग्रेसच्या ज्येष्ठ नेत्यांनी दिला.
या मोर्चात काँग्रेसचे जिल्हाध्यक्ष दीपक पटेल, माजी मंत्री अॅड. पद्माकर वळवी, अॅड. के. सी. पाडवी, खासदार अॅड. गोवाल पाडवी, युवक काँग्रेसचे निलेश पाटील, दिलीप नाईक, सुहास नाईक, अकलाख अन्सारी यांच्यासह विविध आघाड्यांचे पदाधिकारी आणि हजारो नागरिक उत्स्फूर्तपणे सहभागी झाले होते.
