मालमत्ता कर थकवल्याने ग्रामपंचायतीचे कठोर पाऊल; ३० दिवसांत भरणा करण्याचे निर्देश, अन्यथा जंगम व स्थावर मालमत्ता जप्त करण्याचा इशारा
करमाळा : प्रतिनिधी
करमाळा तालुक्यातील विहाळ गावच्या हद्दीत असलेल्या मे. भैरवनाथ शुगर वर्क्स लि., युनिट क्र. २ (शिवगिरी ॲग्रो शुगर वर्क्स प्रा. लि.) या साखर कारखान्याकडे ग्रामपंचायतीचा मालमत्ता कर थकीत असल्याने विहाळ ग्रामपंचायतीने कारखाना प्रशासनाला अंतिम जप्ती नोटीस बजावली आहे. एकूण १४ लाख ९३ हजार ५५९ रुपयांच्या थकबाकीच्या वसुलीसाठी ग्रामपंचायतीने पुढील कारवाईचा इशारा दिला आहे.
ग्रामपंचायतीकडून मिळालेल्या माहितीनुसार, कारखान्याच्या मिळकत क्रमांक ६८० अर्थात फॅक्टरी परिसरावरील १३ लाख ५० हजार ६३४ रुपये, तर कामगार वसाहतीच्या मिळकत क्रमांक ६८१ वरील १ लाख ४२ हजार ९२५ रुपये असा एकूण १४ लाख ९३ हजार ५५९ रुपयांचा मालमत्ता कर थकीत आहे. सन २०२४-२५ आणि २०२५-२६ या दोन आर्थिक वर्षांतील ही थकबाकी आहे.
नोटीसांनंतरही कराचा भरणा न झाल्याने कारवाई
थकीत कराच्या वसुलीसाठी ग्रामपंचायतीने ३० जून २०२६ रोजी कर मागणी बिले बजावली होती. त्यानंतर ४ सप्टेंबर २०२६ रोजी महाराष्ट्र ग्रामपंचायत अधिनियमाच्या कलम १२९ (२) अन्वये मागणी हुकूमनामा (रिट) बजावण्यात आला. मात्र, त्यानंतरही कराचा भरणा झाला नसल्याने ग्रामपंचायतीने पुढील कारवाई करण्याचा निर्णय घेतला.
ग्रामपंचायतीने ठराव क्रमांक ३७ पारित करून गटविकास अधिकारी, पंचायत समिती करमाळा यांची जा.क्र. ६४७/२०२६ अन्वये पूर्वपरवानगी घेतली. त्यानुसार २१ ऑक्टोबर २०२६ रोजी कारखाना प्रशासनाला अंतिम जप्ती नोटीस बजावण्यात आली.
३० दिवसांत थकबाकी भरण्याचे निर्देश
नोटीस मिळाल्यापासून ३० दिवसांच्या आत संपूर्ण थकबाकी जमा करण्याचे निर्देश देण्यात आले आहेत. निर्धारित मुदतीत रक्कम जमा न केल्यास कारखान्याची जंगम व स्थावर मालमत्ता जप्त करून नियमानुसार थकबाकी वसूल करण्याचा इशारा ग्रामपंचायतीने दिला आहे. त्यामुळे कारखाना प्रशासन या नोटिशीला काय प्रतिसाद देते, याकडे लक्ष लागले आहे.
याबाबत ग्रामपंचायतीच्या सरपंच पूजा मोहन मरकड म्हणाल्या, “गावाच्या विकासकामांसाठी ग्रामपंचायतीचा कर हा प्रमुख आर्थिक स्रोत आहे. मोठ्या उद्योगांनी वेळेत कर भरला नाही, तर त्याचा परिणाम गावाच्या विकासकामांवर होतो. नियमानुसार आणि वरिष्ठांच्या परवानगीने ही कारवाई करण्यात आली असून, गावकऱ्यांच्या हितासाठी ग्रामपंचायत कठोर भूमिका घेत आहे.”
या कारवाईची प्रत जिल्हा परिषद सोलापूरचे उपमुख्य कार्यकारी अधिकारी, करमाळ्याचे तहसीलदार आणि गटविकास अधिकारी यांना माहितीस्तव पाठविण्यात आली आहे.
विहाळ ग्रामपंचायतीने थकीत मालमत्ता कराच्या वसुलीसाठी उचललेल्या या पावलामुळे परिसरात चर्चेला सुरुवात झाली आहे. कारखाना प्रशासन निर्धारित मुदतीत थकबाकी भरून पुढील कारवाई टाळणार की जप्तीची प्रक्रिया पुढे जाणार, याकडे ग्रामस्थांचे लक्ष लागले आहे.
