समोरून येणाऱ्या इलेक्ट्रिक स्कूटीची दुचाकीला धडक; दुसरा वाहनचालकही गंभीर जखमी
एरंडोल | प्रतिनिधी :
एरंडोल तालुक्यातील कासोदा पोलीस ठाण्याच्या हद्दीत तळई–उत्राण मार्गावर २३ ऑक्टोबर रोजी रात्री भीषण अपघात झाला. समोरून येणाऱ्या इलेक्ट्रिक स्कूटीने दुचाकीला धडक दिल्याने तळई येथील ३६ वर्षीय विलास पाटील यांचा मृत्यू झाला. या अपघातात इलेक्ट्रिक स्कूटीवरील चालकही गंभीर जखमी झाल्याची माहिती आहे.
मिळालेल्या माहितीनुसार, तळई येथील सावता मंदिरासमोरील रस्त्यावर रात्री सुमारे साडेनऊ वाजण्याच्या सुमारास हा अपघात झाला. विलास पाटील हे आपल्या लाल रंगाच्या प्लॅटिना दुचाकीवरून घरी जात असताना समोरून भरधाव वेगाने येणाऱ्या इलेक्ट्रिक स्कूटीने त्यांच्या दुचाकीला धडक दिली. धडक जोरदार असल्याने विलास पाटील रस्त्यावर पडले आणि गंभीर जखमी झाले.
अपघातानंतर गावातील नागरिकांच्या मदतीने त्यांना भडगाव येथील अंजनी हॉस्पिटल या खासगी रुग्णालयात दाखल करण्यात आले. मात्र, रात्री साडेदहाच्या सुमारास डॉक्टरांनी त्यांना मृत घोषित केले.
या अपघातात दोन्ही वाहनांचे मोठे नुकसान झाले असून, इलेक्ट्रिक स्कूटीवरील तामस्वरे हेदेखील गंभीर जखमी झाल्याचे सांगण्यात आले आहे.
या प्रकरणी विलास पाटील यांचे मोठे भाऊ योगेश पाटील (वय ३९, रा. तळई) यांनी दिलेल्या फिर्यादीवरून कासोदा पोलीस ठाण्यात गुन्हा नोंदविण्यात आला आहे. पोलिसांकडून पुढील तपास सुरू आहे.
विलास पाटील यांच्या निधनामुळे तळई परिसरात हळहळ व्यक्त होत आहे. त्यांच्या पश्चात आई-वडील, एक मुलगा आणि एक मुलगी असा परिवार आहे.
