“विजयादशमी हे सज्जनशक्तीच्या जागरणाचे पर्व” — श्रीनिवास बेडेकर; पंच परिवर्तन आणि कुटुंब प्रबोधनाचा विचार आचरणात आणण्याचे आवाहन
मेहकर | प्रतिनिधी
राष्ट्रीय स्वयंसेवक संघाच्या वतीने विजयादशमी उत्सवानिमित्त मेहकर शहरातून पथसंचलन काढण्यात आले. या पथसंचलनाचे शहरात ठिकठिकाणी पुष्पवृष्टी करून स्वागत करण्यात आले. यानंतर आयोजित कार्यक्रमात श्रीनिवास बेडेकर यांनी विजयादशमीचे महत्त्व विशद करताना, “विजयादशमी हे सज्जनशक्तीच्या जागरणाचे आणि असुरी शक्तींवर विजय मिळविण्याचे पर्व आहे,” असे प्रतिपादन केले.
बेडेकर म्हणाले की, भारतीय संस्कृती अनादी काळापासून अखंडपणे पुढे चालत आली आहे. समाज जेव्हा आपली मूल्ये आणि संस्कार विसरतो, तेव्हा विघातक प्रवृत्तींना बळ मिळते. अशा परिस्थितीत समाजातील सज्जनशक्तीचे जागरण करून त्यावर विजय मिळविण्याची परंपरा भारताच्या इतिहासात दिसून येते. भगवान श्रीराम, भगवान श्रीकृष्ण आणि छत्रपती शिवाजी महाराज यांनी सामान्य जनतेमध्ये जागृती निर्माण करून विजय मिळविला.
याच विचारातून परमपूजनीय डॉ. केशव बळिराम हेडगेवार यांनी राष्ट्रीय स्वयंसेवक संघाची स्थापना करून शाखेच्या माध्यमातून व्यक्तिनिर्माणाचे कार्य सुरू केले. मन, मनगट आणि मस्तिष्क यांना संस्कारित करून स्वयंसेवकांमध्ये समाजसेवेची भावना निर्माण करण्यावर संघाचा भर असल्याचे त्यांनी सांगितले. समाजातील चांगल्या शक्तींना एकत्र आणून देशसेवेचे कार्य पुढे नेण्याची गरजही त्यांनी व्यक्त केली.
संघाच्या पंच परिवर्तनाच्या विचारांच्या आधारे संस्कार जपत समाजाने पुढे वाटचाल करावी, असे आवाहन त्यांनी केले. आधुनिक काळात समाजमाध्यमांवर विविध प्रकारचे विचार आणि कथन प्रसारित होत असताना स्वयंसेवकांनी सतत विवेकबुद्धी जागृत ठेवून समाजात योग्य जाणीव निर्माण करण्याचे कार्य करावे, असेही ते म्हणाले.
कार्यक्रमाचे प्रमुख अतिथी म्हणून श्री शिवाजी शिक्षण संस्थेचे अध्यक्ष सुदेश लोढे उपस्थित होते. त्यांनी आपल्या मनोगतात संघाच्या पंच परिवर्तनाच्या विचारांचा समाजाने स्वीकार करावा, असे मत व्यक्त केले. विशेषतः कुटुंब प्रबोधनाला महत्त्व देत कुटुंबातील संस्कार जपल्याने समाज अधिक सुदृढ होऊ शकतो, असे त्यांनी नमूद केले.
कार्यक्रमाचे प्रास्ताविक नगर कार्यवाह अॅड. इंद्रजीत सावजी यांनी केले. प्रा. गणेश सावजी यांनी सुभाषित, तर प्रा. प्रवीण जोशी यांनी अमृतवचन सादर केले. केशव बाजड यांनी सांघिक गीत घेतले. कार्यक्रमात दंडाची प्रात्यक्षिकेही सादर करण्यात आली.
विजयादशमी उत्सवानिमित्त काढण्यात आलेल्या पथसंचलनाला शहरातील नागरिकांचा प्रतिसाद लाभला. विविध ठिकाणी नागरिकांनी पुष्पवृष्टी करून स्वयंसेवकांचे स्वागत केले.
