आधुनिक कृषी तंत्रज्ञानाची माहिती घेण्यासाठी शेतकऱ्यांचा उत्स्फूर्त सहभाग; शेती विकासासाठी दौरा ठरणार उपयुक्त
पालघर | जिल्हा प्रतिनिधी
पालघर जिल्ह्यातील अग्रगण्य काटाळे विविध शेतकरी सहकारी कार्यकारी संस्थेच्या वतीने आयोजित शेतकरी अभ्यास दौरा खेळीमेळीच्या वातावरणात उत्साहात पार पडला. शेतकऱ्यांना आधुनिक कृषी तंत्रज्ञानाची माहिती मिळावी, शेतीतील नवनवीन प्रयोग समजून घेता यावेत आणि त्यातून शेतीचा विकास साधता यावा, या उद्देशाने सन २०२६ मध्ये या अभ्यास दौऱ्याचे आयोजन करण्यात आले होते.
काटाळे विविध शेतकरी सहकारी कार्यकारी संस्था ही पालघर जिल्ह्यात प्रेरणादायी संस्था म्हणून ओळखली जाते. संस्था सातत्याने विविध उपक्रम राबवून शेतकऱ्यांच्या प्रगतीसाठी प्रयत्नशील असते. याच उपक्रमाचा भाग म्हणून संस्थेचे चेअरमन श्री. मार्तंड पाटील आणि संचालक मंडळ यांनी संस्थेचे सचिव श्री. काळुराम भोईर यांच्या सहकार्याने डॉ. बाळासाहेब सावंत कोकण कृषी विद्यापीठ, दापोली येथे या अभ्यास दौऱ्याचे आयोजन केले.
या दौऱ्याला शेतकऱ्यांकडून उत्स्फूर्त प्रतिसाद मिळाला. आधुनिक शेती पद्धती, कृषी क्षेत्रातील नवे तंत्रज्ञान आणि शेती विकासाच्या संधी यांची माहिती जाणून घेण्याची संधी या माध्यमातून शेतकऱ्यांना मिळाली. या अभ्यास दौऱ्याचा भविष्यात शेतीची उत्पादकता व विकास वाढविण्यासाठी तसेच समृद्ध गावाच्या निर्मितीसाठी निश्चितच फायदा होईल, अशी भावना अनेक शेतकऱ्यांनी व्यक्त केली.
अभ्यास दौरा यशस्वी करण्यासाठी संस्थेचे संचालक श्री. रुपेश रत्नाकर अधिकारी यांनी विशेष सहकार्य केले. या दौऱ्यात संचालक श्री. किरण पाटील, श्री. हेमंत पाटील, श्री. संतोष पाटील आणि श्री. मनोहर पाटील यांच्यासह शेतकरी श्री. रमेश पाटील, अरविंद पाटील, राजेंद्र अधिकारी, भरत पाटील, प्रताप पाटील, अजय पाटील, सचिन पाटील, प्रभाकर पाटील, कु. सौरभ पाटील, अविनाश पाटील, रामभाऊ राऊत आणि गजानन राऊत आदी सहभागी झाले होते.
शेतकऱ्यांना आधुनिक कृषी तंत्रज्ञानाची ओळख करून देणारा आणि भविष्यातील शेती विकासासाठी दिशादर्शक ठरणारा हा अभ्यास दौरा उत्साहात संपन्न झाला.
