संत साहित्य संमेलनात महंत रामगिरीजी महाराज यांच्या हस्ते सन्मान; जामखेडच्या सांस्कृतिक क्षेत्राचा गौरव
जामखेड, (प्रतिनिधी) : जामखेड येथील प्रसिद्ध सूत्रसंचालक हनुमंत महाराज निकम यांना अहिल्यानगर येथे आयोजित संत साहित्य संमेलनात मानाचा ‘संत पाईक गौरव पुरस्कार’ प्रदान करून गौरविण्यात आले. श्रीक्षेत्र गोदाधाम तथा सरला बेट येथील प.पू. महंत रामगिरीजी महाराज यांच्या शुभहस्ते हा पुरस्कार प्रदान करण्यात आला. या सन्मानामुळे जामखेडच्या शिरपेचात आणखी एक मानाचा तुरा रोवला गेला असून, परिसरातून त्यांच्यावर अभिनंदनाचा वर्षाव होत आहे.
मराठी भाषा विभाग, महाराष्ट्र शासन आणि महाराष्ट्र राज्य साहित्य व संस्कृती मंडळ यांच्या अनुदानातून तसेच आनंदोत्सव चॅरिटेबल ट्रस्ट यांच्या संयुक्त विद्यमाने या संत साहित्य संमेलनाचे आयोजन करण्यात आले होते. संत साहित्य, आध्यात्मिक विचार आणि सांस्कृतिक परंपरेचा जागर करणाऱ्या या संमेलनाला विविध क्षेत्रांतील मान्यवरांची उपस्थिती लाभली.
या कार्यक्रमाला राष्ट्रीय स्वयंसेवक संघाचे पश्चिम महाराष्ट्र प्रांत संघचालक नानासाहेब अण्णाजी जाधव, शास्त्रीय संगीततज्ज्ञ पं. डॉ. विकास कशाळकर, महाराष्ट्र साहित्य परिषदेचे पुणे येथील अध्यक्ष तथा ज्येष्ठ रंगकर्मी योगेश सोमण, संमेलनाध्यक्ष डॉ. अनिल सहस्रबुद्धे, स्वागताध्यक्ष सतीश तथा आबा मुळे आणि सह-स्वागताध्यक्ष प्राचार्य पंडित सर यांच्यासह अनेक संत-महंत व मान्यवर उपस्थित होते.
हनुमंत महाराज निकम हे जामखेडमधील प्रसिद्ध सूत्रसंचालक म्हणून परिचित आहेत. संत साहित्य संमेलनासारख्या प्रतिष्ठित व्यासपीठावर त्यांना ‘संत पाईक गौरव पुरस्कार’ मिळाल्याने जामखेडच्या सांस्कृतिक आणि आध्यात्मिक क्षेत्राच्या नावलौकिकात भर पडली आहे. त्यांच्या या सन्मानामुळे जामखेडकरांमध्ये आनंदाचे वातावरण निर्माण झाले असून, हा गौरव संपूर्ण परिसरासाठी अभिमानास्पद ठरला आहे.
