पहाटेच्या अपघातात बसचे मोठे नुकसान; सुदैवाने चालकासह सर्व जवान सुखरूप, शहीद जवानाचे पार्थिव सुरक्षित
मालेगाव, जि. वाशिम, दि. २७ ऑक्टोबर : मालेगाव तालुक्यातून जाणाऱ्या समृद्धी महामार्गावर केंद्रीय राखीव पोलीस दलाच्या (सीआरपीएफ) शहीद जवानाचे पार्थिव घेऊन जाणाऱ्या शासकीय मिनी बसला मंगळवारी, दि. २७ ऑक्टोबर रोजी पहाटे सुमारे ४ वाजताच्या दरम्यान अपघात झाला. सुदैवाने या दुर्घटनेत बसमधील चालकासह सर्व जवान सुखरूप असून, शहीद जवानाचे पार्थिवही सुरक्षित राहिले. त्यामुळे मोठा अनर्थ टळला.
मिळालेल्या माहितीनुसार, मुंबईतील तळोजा येथून सीआरपीएफचे शहीद जवान जय लालसिंग चव्हाण यांचे पार्थिव त्यांच्या मूळ गावी वसंतनगर, ता. दिग्रस येथे नेण्यासाठी दोन वाहनांचा काफिला निघाला होता. हा काफिला मंगळवारी पहाटे सुदी आणि अनसिंग गावांच्या परिसरातील समृद्धी महामार्गावरील चॅनेल क्रमांक २३४ जवळ आला असता, एका सिमेंट मिक्सर ट्रकने डाव्या बाजूने ओव्हरटेक करून पुढे जात अचानक ब्रेक लावल्याचा आरोप तक्रारीत करण्यात आला आहे. त्यामुळे मागून येणारी सीआरपीएफची मिनी बस ट्रकला धडकली.
या अपघातात मिनी बसच्या पुढील भागाचे मोठ्या प्रमाणावर नुकसान झाले. बसचे चालक दादहरी कदम (रा. सीआरपीएफ ग्रुप सेंटर, तळेगाव दाभाडे, जि. पुणे) यांनी याप्रकरणी मालेगाव पोलीस ठाण्यात तक्रार दाखल केली आहे.
सिमेंट मिक्सर ट्रकचालकाच्या भरधाव आणि निष्काळजी वाहनचालनाामुळे अपघात झाल्याचे तक्रारीत नमूद करण्यात आले आहे. या दुर्घटनेत मिनी बसचे अंदाजे दीड लाख रुपयांचे नुकसान झाल्याचा प्राथमिक अंदाज व्यक्त करण्यात आला आहे.
शहीद जवानाचे पार्थिव घेऊन जाणाऱ्या वाहनाला अपघात झाल्याने काही काळ चिंता निर्माण झाली होती. मात्र, सुदैवाने बसमधील चालक आणि सर्व जवानांना कोणतीही दुखापत झाली नाही. तसेच शहीद जवानाचे पार्थिवही सुरक्षित राहिले.
या घटनेमुळे समृद्धी महामार्गावरील वाहनचालकांनी वेगमर्यादा आणि सुरक्षित अंतराचे पालन करण्याची गरज पुन्हा अधोरेखित झाली आहे.
