सामान्य कुटुंबातून वैद्यकीय क्षेत्रात भरारी; ग्रामीण आणि दुर्गम भागात सेवा बजावत उच्च शिक्षणाचे ध्येय केले पूर्ण
प्रतिनिधी | नांदूरघाट (ता. केज)
बीड जिल्ह्यातील केज तालुक्यातील रामेश्वरवाडीसारख्या छोट्याशा गावातील सर्वसामान्य कुटुंबात जन्मलेल्या डॉ. विष्णू हांगे यांनी प्रतिकूल परिस्थितीवर मात करत वैद्यकीय क्षेत्रात उल्लेखनीय यश संपादन केले आहे. अंबाजोगाई येथील स्वामी रामानंद तीर्थ ग्रामीण वैद्यकीय महाविद्यालयातून अस्थिरोगतज्ज्ञ म्हणून उच्च वैद्यकीय शिक्षण पूर्ण करून त्यांनी डॉक्टर होण्याचे स्वप्न साकार केले आहे. त्यांच्या या यशामुळे रामेश्वरवाडीसह केज तालुक्याच्या शिरपेचात मानाचा तुरा रोवला गेला असून, परिसरातून त्यांच्यावर अभिनंदनाचा वर्षाव होत आहे.
आर्थिक अडचणींवर मात करत उच्च शिक्षणाचे ध्येय
डॉ. विष्णू हांगे यांचा शैक्षणिक प्रवास अनेक अडचणींनी भरलेला होता. आर्थिक परिस्थिती प्रतिकूल असतानाही त्यांनी शिक्षणाची जिद्द कायम ठेवली. त्यांचे प्राथमिक शिक्षण गावातील जिल्हा परिषद प्राथमिक शाळेत, तर माध्यमिक शिक्षण नांदूरघाट येथील प्रगती विद्यालयात झाले.
लहानपणापासूनच डॉक्टर होऊन गरजू रुग्णांची सेवा करण्याचे स्वप्न त्यांनी उराशी बाळगले होते. सातत्यपूर्ण अभ्यास, मेहनत आणि चिकाटीच्या जोरावर त्यांनी पुणे येथून एमबीबीएसची पदवी पूर्ण केली आणि वैद्यकीय क्षेत्रातील कारकिर्दीला सुरुवात केली.
ग्रामीण आणि दुर्गम भागात बजावली आरोग्यसेवा
एमबीबीएसचे शिक्षण पूर्ण झाल्यानंतर डॉ. हांगे यांनी केवळ वैयक्तिक प्रगतीचा विचार न करता रुग्णसेवेला प्राधान्य दिले. त्यांनी राजेगाव येथील प्राथमिक आरोग्य केंद्रात वैद्यकीय अधिकारी म्हणून काम सुरू केले. त्यानंतर केज येथील ग्रामीण रुग्णालयातही त्यांनी सेवा बजावली.
विशेष म्हणजे, नंदुरबारसारख्या आदिवासी आणि दुर्गम भागातही त्यांनी वैद्यकीय अधिकारी म्हणून कर्तव्य पार पाडले. मर्यादित सुविधांमध्ये ग्रामीण आणि दुर्गम भागातील रुग्णांना आरोग्यसेवा देण्याचा त्यांचा अनुभव त्यांच्या सेवाभावी वृत्तीचे दर्शन घडवतो.
नोकरीसोबत उच्च शिक्षणाचा ध्यास
वैद्यकीय सेवा बजावत असतानाही उच्च शिक्षण घेण्याची त्यांची जिद्द कायम राहिली. त्यांनी अंबाजोगाई येथील स्वामी रामानंद तीर्थ ग्रामीण वैद्यकीय महाविद्यालयातून पुढील वैद्यकीय शिक्षण घेतले. त्यानंतर अस्थिरोगशास्त्रातील पदव्युत्तर शिक्षण पूर्ण करून अस्थिरोगतज्ज्ञ म्हणून आपली ओळख निर्माण केली.
ग्रामीण तरुणांसाठी प्रेरणादायी यश
सध्या डॉ. विष्णू हांगे हे परळी येथील उपजिल्हा रुग्णालयात वैद्यकीय अधिकारी तथा अस्थिरोगतज्ज्ञ म्हणून सेवा बजावत आहेत. त्यांच्या प्रवासातून जिद्द, सातत्यपूर्ण प्रयत्न आणि शिक्षणावरील निष्ठा यांच्या बळावर प्रतिकूल परिस्थितीवर मात करता येते, हा संदेश ग्रामीण भागातील तरुणांना मिळत आहे.
रामेश्वरवाडीसह केज तालुक्यातून अभिनंदन
डॉ. विष्णू हांगे यांच्या यशामुळे रामेश्वरवाडी आणि केज तालुक्याचे नाव उज्ज्वल झाले आहे. जिल्हा परिषद शाळेचे शिक्षक राजकुमार हांगे यांच्यासह ग्रामस्थ, प्रतिष्ठित नागरिक, तरुण मंडळे तसेच विविध सामाजिक आणि शैक्षणिक संघटनांकडून त्यांचे अभिनंदन करण्यात येत आहे. त्यांच्या पुढील वाटचालीसाठी आणि रुग्णसेवेसाठी शुभेच्छा व्यक्त केल्या जात आहेत.
प्रतिकूल परिस्थितीवर मात करून यश मिळवणारे डॉ. विष्णू हांगे हे ग्रामीण भागातील विद्यार्थ्यांसाठी प्रेरणेचा स्रोत ठरत आहेत.
