🟣🟡 माध्यमिक विद्यालय, आरदाळ येथे दहावी विद्यार्थ्यांचा भावनिक निरोप सोहळा 🟡🟣

आरदाळ : माध्यमिक विद्यालय, आरदाळ येथे इयत्ता दहावीच्या विद्यार्थ्यांसाठी सदिच्छा समारंभ उत्साहपूर्ण आणि भावनिक वातावरणात पार पडला. कार्यक्रमाची सुरुवात महान समाजसुधारक छत्रपती शाहू महाराज यांच्या प्रतिमेस पुष्पहार अर्पण करून करण्यात आली. त्यानंतर उपस्थित मान्यवरांचे गुलाबपुष्प देऊन स्वागत करण्यात आले.
शाळेचे मुख्याध्यापक शरद पाटील यांनी प्रास्ताविकात शाळेच्या शैक्षणिक प्रगतीचा आढावा घेत विद्यार्थ्यांना आत्मविश्वास, शिस्त आणि सातत्यपूर्ण अभ्यासाचे महत्त्व पटवून दिले. “मोठी स्वप्ने पाहा आणि त्यासाठी मनापासून परिश्रम करा,” असा संदेश त्यांनी विद्यार्थ्यांना दिला.
कार्यक्रमाच्या अध्यक्षस्थानी संस्थेचे अध्यक्ष हरिभाऊ पुंडपळ होते, तर प्रमुख मार्गदर्शक म्हणून शैलेंद्र आमणगी उपस्थित होते. दोन्ही मान्यवरांचा शाळेच्या वतीने सत्कार करण्यात आला.
यावेळी दहावीतील आदर्श वर्तन व सातत्यपूर्ण अभ्यासासाठी विद्यार्थ्यांचा विशेष गौरव करण्यात आला. आदर्श विद्यार्थिनी म्हणून हर्षदा निलेश नरवडकर तर आदर्श विद्यार्थी म्हणून रणवीर राजेंद्र देसाई यांना पुरस्कार प्रदान करण्यात आले.
इयत्ता आठवी व नववीच्या विद्यार्थ्यांनी आपल्या भावना व्यक्त करत दहावीच्या विद्यार्थ्यांना परीक्षेसाठी शुभेच्छा दिल्या. दहावीच्या विद्यार्थ्यांनीही शाळा, शिक्षक आणि कर्मचाऱ्यांप्रती कृतज्ञता व्यक्त करताना आठवणींना उजाळा दिला. यामुळे सभागृहात भावनिक वातावरण निर्माण झाले.
शिक्षक किरण चव्हाण व स्वप्नाली बांबरे यांनी विद्यार्थ्यांना आत्मविश्वास आणि सकारात्मकतेचा मंत्र दिला. प्रमुख मार्गदर्शक शैलेंद्र आमणगी यांनी आपल्या शैक्षणिक प्रवासातील अनुभव सांगत विद्यार्थ्यांना ध्येयवेडे होण्याचा सल्ला दिला. अध्यक्ष हरिभाऊ पुंडपपळ यांनी विद्यार्थ्यांनी प्रामाणिक प्रयत्नातून उज्ज्वल भवितव्य घडवावे, असे मार्गदर्शन केले.
कार्यक्रमाचे सूत्रसंचालन लक्ष्मण लोहार यांनी केले, तर आभार प्रदर्शन रणजित सुतार यांनी मानले. शिक्षक, शिक्षकेतर कर्मचारी, पालक व विद्यार्थी मोठ्या संख्येने उपस्थित होते.
दहावीच्या विद्यार्थ्यांना उज्ज्वल भवितव्यासाठी शुभेच्छा देत कार्यक्रमाची सांगता करण्यात आली.