🔵🟠 आजरा येथील व्यंकटराव शिक्षण संकुलात दहावी विद्यार्थ्यांचा शुभेच्छा समारंभ उत्साहात 🟠🔵

आजरा : येथील व्यंकटराव हायस्कूल व ज्युनिअर कॉलेज, आजरा येथे इयत्ता दहावीच्या विद्यार्थ्यांना बोर्ड परीक्षेसाठी शुभेच्छा देण्याचा समारंभ उत्साहपूर्ण वातावरणात पार पडला. कार्यक्रमाच्या अध्यक्षस्थानी आजरा महाल शिक्षण मंडळ, आजरा चे अध्यक्ष जयवंतराव शिंपी होते.
कार्यक्रमास संस्थेचे उपाध्यक्ष कृष्णा पटेकर, सचिव अभिषेक शिंपी, संचालक पांडुरंग जाधव, सचिन शिंपी, सुधीर जाधव व विलास पाटील यांची प्रमुख उपस्थिती लाभली.
अध्यक्षीय भाषणात जयवंतराव शिंपी यांनी विद्यार्थ्यांना ध्येय निश्चित करून जिद्दीने अभ्यास करण्याचा सल्ला दिला. “कठीण होतं पण मी करून दाखवलं” असे आत्मविश्वासाने म्हणता येईल, अशी मेहनत करा, असे प्रेरणादायी शब्द त्यांनी उच्चारले. देशाचे भविष्य विद्यार्थ्यांच्या खांद्यावर असून त्यांनी अभ्यासू, जिद्दी आणि मेहनती बनावे, असेही ते म्हणाले.

उपाध्यक्ष कृष्णा पटेकर यांनी विद्यार्थ्यांना आवडते क्षेत्र निवडून त्यात करिअर घडविण्याचे मार्गदर्शन केले. आत्मचिंतन व सकारात्मक दृष्टीकोन यांचे महत्त्व त्यांनी अधोरेखित केले. सचिव अभिषेक शिंपी यांनी ज्ञान, भक्ती आणि विवेक यामधील ‘विवेक’ या गुणाचे महत्त्व स्पष्ट केले. स्पर्धा परीक्षांच्या पूर्वतयारीसाठी संकुलात सुरू असलेल्या अकॅडमी वर्गांचा विद्यार्थ्यांनी लाभ घ्यावा, असे आवाहन त्यांनी केले.
प्राचार्य एम. एम. नागुर्डेकर यांनी विद्यार्थ्यांनी परीक्षेला तणावमुक्त आणि धैर्याने सामोरे जावे, असे सांगितले. शासनाच्या नव्या नियमावलींची माहितीही त्यांनी विद्यार्थ्यांना करून दिली. शिक्षक मनोगतात व्ही. एच. गवारी यांनी परिश्रम आणि सातत्य यांचे महत्त्व पटवून देत डॉ. बाबासाहेब आंबेडकर यांच्या अभ्यासू वृत्तीचा आदर्श विद्यार्थ्यांसमोर ठेवला.
विद्यार्थी प्रतिनिधी म्हणून प्रणव पाटील, सिमरन पाटील, माधवी आजगेकर, दिशा पाटील व शलाका गिरी यांनी शाळेबद्दल कृतज्ञता व्यक्त केली. नववीतील विद्यार्थिनी सानवी चौगुले हिने दहावीच्या विद्यार्थ्यांना मनःपूर्वक शुभेच्छा दिल्या.
या निमित्ताने इंग्रजी विषय विभागातर्फे सामान्यज्ञान परीक्षेचे आयोजन करण्यात आले होते. सुमारे ६०० विद्यार्थ्यांनी सहभाग घेतला. त्यातील प्रथम तीन क्रमांक प्राप्त विद्यार्थ्यांना रोख रक्कम व प्रशस्तीपत्र देऊन गौरविण्यात आले.
इयत्ता दहावीच्या विद्यार्थ्यांनी शाळेला दोन टेबल भेट देत कृतज्ञता व्यक्त केली.
कार्यक्रमाचे प्रास्ताविक एस. टी. पाटील यांनी केले. सूत्रसंचालन आर. एन. पाटील यांनी तर आभार प्रदर्शन एम. व्ही. बिल्ले यांनी मानले. पर्यवेक्षिका व्ही. जे. शेलार, सर्व वर्गशिक्षक, शिक्षक-शिक्षिका, शिक्षकेतर कर्मचारी व विद्यार्थी मोठ्या संख्येने उपस्थित होते.
दहावीच्या विद्यार्थ्यांना उज्ज्वल भविष्यासाठी शुभेच्छा देत कार्यक्रमाची सांगता झाली.