नागोठणे | दि. १७ फेब्रुवारी
रायगड जिल्ह्यात पत्रकारितेची सामाजिक बांधिलकी जपत कार्यरत असलेल्या नागोठणे ग्रामीण विभाग पत्रकार असोसिएशन (संलग्न: रायगड प्रेस क्लब) यांचा चौदावा वर्धापन दिन सोहळा लवकरच उत्साहात साजरा होणार असून, यानिमित्त देण्यात येणारे वार्षिक पत्रकार पुरस्कार जाहीर करण्यात आले आहेत.
मंगळवारी (दि.१७) झालेल्या बैठकीत पुरस्कारांची घोषणा करण्यात आली. गेल्या तेरा वर्षांपासून सातत्याने वर्धापन दिन साजरा करणाऱ्या या संघटनेतर्फे पत्रकारितेतील उल्लेखनीय कार्याचा गौरव केला जातो. यंदाही विविध क्षेत्रातील मान्यवर आणि गुणवंत विद्यार्थ्यांचा विशेष सत्कार करण्याचा निर्णय घेण्यात आला.
संघटनेचे मार्गदर्शक भाई टके यांच्या प्रमुख उपस्थितीत झालेल्या बैठकीला संस्थापक शामकांत नेरपगार, अध्यक्ष अॅड. महेश पवार, सचिव अनिल पवार, सहसचिव राजेंद्र जोशी व सदस्य उपस्थित होते.
जाहीर झालेले पुरस्कार मानकरी पुढीलप्रमाणे :
- कै. तात्यासाहेब टके ज्येष्ठ पत्रकार पुरस्कार : यशवंत बापू कांबळे (दैनिक रत्नागिरी टाइम्स, दापोली प्रतिनिधी – सुमारे २० वर्षांहून अधिक कार्य)
- उत्कृष्ट पत्रकार पुरस्कार : प्रशांत किसन शेडगे (दैनिक पुण्यनगरी, पनवेल प्रतिनिधी)
- युवा पत्रकार पुरस्कार : परेश दत्तात्रेय शिंदे (दैनिक सागर, माणगाव प्रतिनिधी व कार्यालय प्रमुख)
पत्रकारितेच्या माध्यमातून समाजाभिमुख कार्य करणाऱ्या या तिन्ही मानकऱ्यांचा वर्धापन दिन सोहळ्यात सन्मान करण्यात येणार आहे.
