हजारो भीम सैनिकांच्या उपस्थितीत रात्रभर रंगली प्रबोधनाची मैफल
प्रतिनिधी :
त्यागमूर्ती माता रमाई आंबेडकर यांच्या जयंतीनिमित्त माहूर येथे आयोजित करण्यात आलेला ‘भिम महोत्सव’ रविवार (२२ फेब्रुवारी) रोजी उत्साहात आणि अविस्मरणीय वातावरणात पार पडला. सायंकाळी पावसाने हजेरी लावूनही हजारो भीम सैनिक आणि रसिक प्रेक्षकांनी मोठ्या संख्येने उपस्थित राहून कार्यक्रम यशस्वी केला.
कार्यक्रमाच्या सुरुवातीलाच पावसाने अडथळा आणण्याचा प्रयत्न केला; मात्र उपस्थितांचा उत्साह कमी झाला नाही. पावसाची पर्वा न करता बुद्धभूमी परिसरात मोठी गर्दी झाली होती. माता रमाई यांच्या प्रतिमेचे पूजन करून कार्यक्रमाची सुरुवात करण्यात आली. त्यानंतर भिक्खुणी आर्या खेमा यांनी ‘धम्म वंदना’ घेऊन कार्यक्रमाचे उद्घाटन केले.
या महोत्सवाचे मुख्य आकर्षण असलेले सुप्रसिद्ध गायक फैजान ताज (नागपूर) आणि गायिका मंजुषा शिंदे (पुणे) यांनी आपल्या दमदार आवाजात भीमगीते व प्रबोधनात्मक गीते सादर करून उपस्थितांना मंत्रमुग्ध केले. रात्री सुरू झालेला हा सांस्कृतिक कार्यक्रम पहाटे ८ वाजेपर्यंत अखंड सुरू होता. मोठ्या एलईडी स्क्रीनमुळे दूरवर बसलेल्या प्रेक्षकांनाही कार्यक्रमाचा आनंद घेता आला.
कार्यक्रमाला प्रमुख अतिथी म्हणून माता रमाई यांच्या भाची शुभांगीताई शंकरराव धोत्रे यांची उपस्थिती लाभली. तसेच नगराध्यक्ष फिरोज दोसानी, पोलिस निरीक्षक देविदास चोपडे, आयोजन समिती अध्यक्ष रेणुकादास वानखेडे, सामाजिक कार्यकर्ते तथा पत्रकार मनोज किर्तने, डॉ. निरंजन केशवे, डॉ. राजेंद्र लोणे, तसेच विविध राजकीय पक्षांचे पदाधिकारी, पत्रकार, नगरसेवक, समता सैनिक दल व क्रांतिज्योती महिला मंडळाचे प्रतिनिधी मोठ्या संख्येने उपस्थित होते.
कार्यक्रमाचे सूत्रसंचालन उत्तम कानिंदे यांनी केले, तर प्रकाश गायकवाड यांनी आभार मानले. ‘भिम महोत्सव समिती, माहूर’चे आयोजक आकाश रमेश कांबळे व अर्जुन बरडे यांनी कार्यक्रम यशस्वी करण्यासाठी परिश्रम घेतले.
माहूर परिसरातील विविध गावांतून आलेल्या हजारो भीम सैनिकांच्या शिस्तबद्ध उपस्थितीमुळे आणि उत्स्फूर्त सहभागामुळे हा सोहळा ऐतिहासिक ठरला.
