पाथरी (प्रतिनिधी)
पाथरी शहरात क्रांतीसूर्य महात्मा ज्योतिबा फुले आणि भारतरत्न डॉ. बाबासाहेब आंबेडकर यांची संयुक्त जयंती मोठ्या उत्साहात व भक्तीमय वातावरणात साजरी करण्यात आली. या निमित्ताने शहरात सामाजिक एकात्मतेचे दर्शन घडले.
कार्यक्रमादरम्यान नगराध्यक्ष आसेफ खान यांनी पाथरी शहरात लवकरच डॉ. बाबासाहेब आंबेडकर यांचा पूर्णाकृती भव्य पुतळा उभारण्यात येणार असल्याची घोषणा केली. या घोषणेमुळे उपस्थितांमध्ये आनंदाचे वातावरण निर्माण झाले.
१४ एप्रिल रोजी सकाळी ११:३० वाजता डॉ. बाबासाहेब आंबेडकर पुतळा परिसरात कार्यक्रमाचे आयोजन उत्सव समिती अध्यक्ष विकास ढवळे यांच्या नेतृत्वाखाली करण्यात आले होते. कार्यक्रमाच्या अध्यक्षस्थानी पोलीस निरीक्षक केंद्रे होते.
यावेळी नगराध्यक्ष आसेफ खान, उपनगराध्यक्ष आलोक चौधरी, समिती अध्यक्ष विकास ढवळे यांच्या हस्ते महामानवांच्या प्रतिमांना पुष्पहार अर्पण करण्यात आले. त्यानंतर भंते शरणानंदजी महाथेरो यांच्या हस्ते धम्मध्वजाचे ध्वजारोहण करण्यात आले. तसेच भंते शरणानंदजी महाथेरो, बौद्धाचार्य शुद्धोधन शिंदे व टी. एम. शेळके यांच्या उपस्थितीत बुद्धवंदना घेण्यात आली.
या कार्यक्रमास नगरसेवक, माजी नगरसेवक, सामाजिक कार्यकर्ते, पत्रकार तसेच मोठ्या संख्येने नागरिक उपस्थित होते. कार्यक्रमाचे प्रास्ताविक, सूत्रसंचालन व आभार प्रदर्शन यावेळी पार पडले.
कार्यक्रमाच्या यशस्वीतेसाठी विविध पदाधिकाऱ्यांनी विशेष परिश्रम घेतले. पाथरी शहरात सामाजिक एकात्मता आणि प्रेरणादायी वातावरणात ही जयंती उत्साहात संपन्न झाली.
