कणकवली, दि. १४ एप्रिल : कणकवली नगरपंचायतीच्या वतीने बुद्धविहार परिसरात उभारण्यात आलेल्या प्रसाधनगृहाचे काम पूर्ण झाले असून, नगराध्यक्ष संदेश पारकर यांनी या कामाची प्रत्यक्ष पाहणी केली.
कणकवली तालुका बौद्ध विकास संघ, मुंबई शाखा कणकवली यांच्या मागणीनुसार समाजकल्याण निधीतून सुमारे २३ लाख रुपयांचा खर्च करून हे प्रसाधनगृह उभारण्यात आले आहे. या सुविधेमुळे परिसरातील नागरिकांना मोठा दिलासा मिळणार आहे.
पाहणीवेळी नगराध्यक्ष संदेश पारकर यांच्यासह नगरसेवक लोकेश कांबळे, नगरसेविका दीपिका जाधव, सुदीप कांबळे, सुजित जाधव, तसेच कणकवली तालुका बौद्ध विकास संघाचे सचिव संजय कदम, अध्यक्ष अंकुश कदम आणि इतर पदाधिकारी व कार्यकारी सदस्य उपस्थित होते.
दरम्यान, महामानव डॉ. बाबासाहेब आंबेडकर आणि महात्मा ज्योतिराव फुले यांच्या संयुक्त जयंतीनिमित्त मंगळवार, दि. १४ एप्रिल रोजी या प्रसाधनगृहाचे उद्घाटन करण्यात येणार आहे. नगराध्यक्ष संदेश पारकर आणि मुख्याधिकारी गौरी पाटील यांच्या हस्ते हा कार्यक्रम पार पडणार असल्याची माहिती संघाचे सचिव संजय कदम यांनी दिली.
