📰 कल्याण पूर्वच्या मूलभूत प्रश्नांवर आयुक्तांसोबत सविस्तर चर्चा

कल्याण : १४२ कल्याण पूर्व विधानसभा क्षेत्रातील नागरिकांच्या मूलभूत प्रश्नांवर आज कल्याण डोंबिवली महानगरपालिका आयुक्त अभिनव गोयल यांच्या दालनात सविस्तर व सकारात्मक चर्चा पार पडली.

या बैठकीत विशेषतः कल्याण पूर्व भागातील पाणीपुरवठा, MIDC कडून कमी दाबाने होणारा पाणीपुरवठा, अमृत योजनेतील प्रलंबित कामे, जलवाहिन्यांची देखभाल, पाण्याच्या टाक्यांची स्वच्छता तसेच जाणीवपूर्वक पाणीटंचाई निर्माण करणाऱ्यांवर कारवाई यांसारख्या महत्त्वाच्या विषयांवर ठोस भूमिका मांडण्यात आली.

तसेच नालेसफाई, रस्ते रुंदीकरणातील अडथळे, स्कायवॉकची दुरुस्ती व स्वच्छता, अग्निशामक सेवा उपलब्धता, क्रीडांगणांची देखभाल, सार्वजनिक शौचालयांची दुरवस्था, नवीन पादचारी पूल उभारणी, नागरिकांसाठी बस सेवा सुरू करणे, पूल व रस्ते कामे वेळेत पूर्ण करणे, पुनर्वसन प्रश्न तसेच आवश्यक नागरी सुविधा उभारण्याबाबतही लक्ष वेधण्यात आले.

आयुक्तांनी सर्व मुद्दे गांभीर्याने घेत संबंधित अधिकाऱ्यांना तातडीने कार्यवाहीचे निर्देश दिले. निष्क्रिय व निष्काळजी अधिकाऱ्यांवर कडक कारवाई करण्याचे स्पष्ट आदेशही त्यांनी दिले.

ही बैठक नागरिकांच्या हितासाठी सकारात्मक दिशेने टाकलेले महत्त्वाचे पाऊल असून, लवकरच सर्व प्रश्नांवर ठोस उपाययोजना होईल असा विश्वास व्यक्त करण्यात आला.

यावेळी निवडणूक प्रमुख संजय मोरे, नगरसेविका डॉ. पूजा गायकवाड, प्रणाली जोशी, माजी नगरसेवक अभिमन्यू गायकवाड, मनोज राय तसेच इतर मान्यवर व अधिकारी कर्मचारी उपस्थित होते.

श्रीकांत रा. धोकटे (ठाणे शहर लोकप्रतिनिधी) यांनी सर्वांच्या सहकार्याने कल्याण पूर्व अधिक सक्षम, स्वच्छ व सुविधायुक्त करण्यासाठी प्रयत्न सुरूच राहतील, असे सांगितले.