भडगाव (प्रतिनिधी) : राज्यातील विविध प्रलंबित मागण्यांसाठी पुकारण्यात आलेल्या राज्यव्यापी बेमुदत संपात भडगाव तालुक्यातील ग्राम महसूल अधिकारी (तलाठी) व मंडळ अधिकारी यांनी उत्स्फूर्त सहभाग नोंदविला आहे. महाराष्ट्र राज्य तलाठी संघ च्या निर्णयानुसार दि. २१ एप्रिल २०२६ पासून तालुक्यातील सर्व तलाठी व मंडळ अधिकारी बेमुदत संपावर गेले आहेत.
या संपामागे वेतनवाढ, सेवा अटींमध्ये सुधारणा तसेच इतर प्रलंबित प्रशासकीय मागण्या असल्याची माहिती संघटनेच्या पदाधिकाऱ्यांनी दिली. संपामुळे महसूल विभागातील दैनंदिन कामकाजावर मोठा परिणाम होण्याची शक्यता असून नागरिकांमध्ये चिंतेचे वातावरण निर्माण झाले आहे.
विशेषतः सातबारा उतारे, फेरफार नोंदी, उत्पन्न दाखले, जात प्रमाणपत्रे यांसारख्या अत्यावश्यक सेवांवर परिणाम होणार असल्याची भीती व्यक्त केली जात आहे. त्यामुळे शासकीय कामांसाठी नागरिकांना अडचणींचा सामना करावा लागू शकतो.
दरम्यान, प्रशासनाकडून अद्याप अधिकृत भूमिका जाहीर करण्यात आलेली नसून परिस्थितीवर बारकाईने लक्ष ठेवण्यात येत असल्याचे समजते. नागरिकांनी अत्यावश्यक कागदपत्रांसाठी पर्यायी व्यवस्था करावी, असे आवाहनही करण्यात येत आहे.
या संपात भडगाव तालुका ग्राम महसूल अधिकारी व मंडळ अधिकारी संघाचे अध्यक्ष अविनाश जंजाळे, सचिव संजय सोनवणे तसेच प्रशांत कुंभारे, योगेश पाटील, एम. जे. खाटीक, विवेक महाजन, दिपक पाटील, शीतल राजपूत, नीता अकोटकर, वैशाली वाघ, प्रियांका शिंदे, गायत्री पाटील, अनिता सुतार, महसूल सेवक किरण मोरे व कविता सोनवणे आदी सहभागी झाले आहेत. शासन व कर्मचारी संघटनांमध्ये लवकर तोडगा निघावा, अशी अपेक्षा नागरिकांकडून व्यक्त होत आहे.
