नवी मुंबई प्रतिनिधी :
ऐरोली परिसरात चालत्या स्कुटीवरून महिलांचा विनयभंग करणाऱ्या एका विकृत तरुणाला रबाळे पोलिसांनी तांत्रिक तपास आणि सीसीटीव्ही फुटेजच्या आधारे अटक केली आहे. या कारवाईमुळे परिसरातील महिलांमध्ये निर्माण झालेली भीती काही प्रमाणात कमी झाली असून पोलिसांच्या तत्परतेचे कौतुक होत आहे.
रबाळे पोलीस ठाण्यात या प्रकरणी गु.र.न. ४०५/२०२६ व ४०७/२०२६ अन्वये भारतीय न्याय संहिता (BNS) कलम ७४ व ७८ प्रमाणे गुन्हे दाखल करण्यात आले आहेत. अटक करण्यात आलेल्या आरोपीचे नाव कृष्णा महेंद्र कनोजिया (वय २१) असे असून तो कलवा पूर्व येथील गणपतीपाडा परिसरात राहणारा आहे.
पोलिसांनी दिलेल्या माहितीनुसार, दिनांक २६ मे २०२६ रोजी सायंकाळी साडेचार वाजण्याच्या सुमारास फिर्यादी तरुणी आपल्या मैत्रिणीच्या घरी जात असताना ऐरोली सेक्टर ६ मधील सेलिब्रेशन बिल्डिंगच्या मागील गेटजवळ आरोपीने पांढऱ्या रंगाच्या बर्गमन स्कुटीवरून तिचा पाठलाग केला. त्यानंतर आरोपीने चालत्या वाहनावरून फिर्यादीचा विनयभंग करून घटनास्थळावरून पळ काढला.
घटनेनंतर पीडित तरुणीने रबाळे पोलीस ठाण्यात तक्रार दाखल केली. गुन्ह्याचे गांभीर्य लक्षात घेऊन वरिष्ठ पोलीस निरीक्षक बाळकृष्ण सावंत, पोलीस निरीक्षक सचिन गवळी (गुन्हे) व पोलीस निरीक्षक श्याम बनसोडे (प्रशासन) यांच्या मार्गदर्शनाखाली गुन्हे प्रकटीकरण पथकाने तपासाची चक्रे वेगाने फिरवली.
घटनास्थळावरील सीसीटीव्ही फुटेज, तांत्रिक विश्लेषण तसेच गुप्त बातमीदारांच्या मदतीने आरोपीचा शोध घेण्यात आला. अखेर आरोपीला ताब्यात घेण्यात पोलिसांना यश आले. प्राथमिक चौकशीत आरोपीने यापूर्वीही अशाच प्रकारचे गुन्हे केल्याची कबुली दिल्याची माहिती पोलिसांनी दिली असून त्याबाबत अधिक तपास सुरू आहे.
या कारवाईत सपोनि अविनाश पाळदे, पोउनि राहुल गरड, पोहवा दर्शन कटके, पोहवा वायंगणकर, पोहवा मयूर सोनवणे, पोशि मनोज देडे आणि पोशि यादवराव घुले यांनी सहभाग घेतला.
