दापोली | प्रतिनिधी
दापोली तालुक्यातील वळणे एमआयडीसी परिसरात एका ७ वर्षीय अल्पवयीन मुलीशी कथित गैरवर्तन केल्याप्रकरणी ५० वर्षीय हॉटेल चालकाविरुद्ध पोक्सो (POCSO) कायदा तसेच भारतीय न्याय संहिता (BNS) अंतर्गत गुन्हा दाखल करण्यात आला असून पोलिसांनी संशयिताला अटक केली आहे. न्यायालयाने त्याला पोलीस कोठडी सुनावली असून पुढील तपास सुरू आहे.
पोलिसांनी दिलेल्या माहितीनुसार, दि. ७ जुलै रोजी सायंकाळी पीडित मुलगी तिच्या १२ वर्षीय भावासोबत वडापाव घेण्यासाठी संबंधित हॉटेलमध्ये गेली होती. तक्रारीनुसार, त्यावेळी संशयिताने मुलीच्या भावाला बाहेर पाठवून मुलीशी कथित गैरवर्तन केले.
घरी परतल्यानंतर मुलीने घडलेला प्रकार आईला सांगितला. त्यानंतर पालकांनी दापोली पोलीस ठाण्यात तक्रार दाखल केली. तक्रारीच्या आधारे पोलिसांनी रुदाणी भगवानजी रामजीभाई (वय ५०) याच्याविरुद्ध पोक्सो कायदा आणि भारतीय न्याय संहितेतील संबंधित कलमांनुसार गुन्हा दाखल करून त्याला अटक केली.
अटक करण्यात आलेल्या संशयिताला न्यायालयात हजर केले असता न्यायालयाने त्याला पोलीस कोठडी सुनावली. या प्रकरणाचा पुढील तपास सहाय्यक पोलीस निरीक्षक पूजा हिरेमठ यांच्या मार्गदर्शनाखाली सुरू आहे.
