प्रतिनिधी :
विद्यार्थिनींच्या सुरक्षितता, सक्षमीकरण आणि सामाजिक सहभागाला प्रोत्साहन देण्याच्या उद्देशाने युवा क्रांती फाउंडेशन अंतर्गत पोलीस मित्र, ग्राहक व पत्रकार संरक्षण आणि माहिती अधिकार संघटनेने ‘युवा तेजस्विनी योजना’ जाहीर केली आहे.
संघटनेच्या नुकत्याच झालेल्या बैठकीत इयत्ता १०वी, ११वी आणि १२वी मध्ये शिक्षण घेणाऱ्या विद्यार्थिनींसाठी ही विशेष योजना सुरू करण्याचा निर्णय घेण्यात आला. या योजनेअंतर्गत पात्र विद्यार्थिनींसाठी संघटनेचे सदस्यत्व शुल्क ₹३०० निश्चित करण्यात आले आहे.
योजनेचा उद्देश विद्यार्थिनींना संघटनेशी जोडणे, त्यांच्यात सामाजिक जाणीव निर्माण करणे, सुरक्षिततेसाठी संघटनात्मक पाठबळ उपलब्ध करून देणे तसेच समाजसेवा, नेतृत्व विकास आणि जनजागृतीच्या उपक्रमांमध्ये त्यांचा सक्रिय सहभाग वाढविणे हा आहे.
ही योजना युवा क्रांती फाउंडेशनचे संस्थापक व राष्ट्रीय अध्यक्ष रविंद्र सूर्यवंशी यांच्या मार्गदर्शनाखाली सुरू करण्यात आली असून, मुलींच्या सुरक्षितता आणि सक्षमीकरणाच्या दिशेने हे महत्त्वाचे पाऊल असल्याचे संघटनेच्या वतीने सांगण्यात आले.
संघटनेचे सर्व पदाधिकारी, सदस्य आणि कार्यकर्त्यांनी आपल्या परिसरातील पात्र विद्यार्थिनींपर्यंत या योजनेची माहिती पोहोचवून त्यांना या उपक्रमाचा लाभ मिळवून द्यावा, असे आवाहन संघटनेच्या वतीने करण्यात आले आहे.
