पातूर | प्रतिनिधी :
घर पाडताना साडेतीन किलो सोन्याच्या नाण्यांचा माठ सापडल्याचे आमिष दाखवत कोल्हापूर येथील एका व्यावसायिकाची तब्बल १५ लाख रुपयांची फसवणूक केल्याची घटना उघडकीस आली आहे. या प्रकरणी पातूर पोलीस ठाण्यात आरोपीविरुद्ध फसवणुकीसह विविध कलमान्वये गुन्हा दाखल करण्यात आला आहे.
पोलिसांनी दिलेल्या माहितीनुसार, युवराज चांदोबा कांबळे (वय ४९, रा. वडणगे, ता. करवीर, जि. कोल्हापूर) यांनी याबाबत तक्रार दाखल केली आहे. तर गणेश रमेश इंगळे याच्याविरुद्ध गुन्हा नोंदविण्यात आला आहे.
तक्रारीनुसार, आरोपीची फिर्यादीशी यापूर्वी एका हॉटेलमध्ये ओळख झाली होती. त्यानंतर ३० जून २०२६ रोजी आरोपीने फोन करून आपल्या बहिणी व मेहुण्याला घर पाडताना साडेतीन किलो वजनाचा सोन्याच्या नाण्यांचा माठ सापडल्याचे सांगितले. हा माल ५० लाख रुपयांत विकण्याची तयारी असल्याचे सांगून त्याने फिर्यादीला आमिष दाखवले.
विश्वास संपादन करण्यासाठी आरोपीने फिर्यादीला एक सोन्याचे नाणे दिले. ते नाणे सोनाराकडे तपासणीसाठी दिल्यानंतर ते खरे सोने असल्याचे निष्पन्न झाले. त्यामुळे आरोपीवर विश्वास ठेवून फिर्यादीने ४ जुलै २०२६ रोजी अकोला जिल्ह्यातील नांदखेड फाटा (ता. पातूर) येथे आरोपीला रोख १५ लाख रुपये दिले.
बदल्यात आरोपीने ३ किलो ३०० ग्रॅम वजनाची नाणी दिली. मात्र, पुढील तपासणीत ही सर्व नाणी बनावट असल्याचे उघड झाले. फसवणूक झाल्याचे लक्षात येताच फिर्यादीने पातूर पोलीस ठाण्यात तक्रार दाखल केली.
या प्रकरणी पातूर पोलिसांनी आरोपीविरुद्ध गुन्हा नोंदविला असून एएसआय चव्हाण यांनी गुन्हा दाखल केला आहे. पुढील तपास पीएसआय मेश्राम करीत आहेत.
सूचना: कोणत्याही मौल्यवान वस्तू, सोने किंवा पुरातन वस्तू स्वस्तात मिळण्याचे आमिष दाखवून होणाऱ्या व्यवहारांबाबत नागरिकांनी योग्य पडताळणी करूनच आर्थिक व्यवहार करावेत, असे आवाहन पोलिसांकडून करण्यात येत आहे.
