रत्नागिरी | प्रतिनिधी
आकाशवाणी रत्नागिरी केंद्राच्या लोकप्रिय ‘बाल जगत’ कार्यक्रमात यंदा भरतनाट्यम क्षेत्रात उल्लेखनीय वाटचाल करणारी युवा नृत्यांगना स्वरा आशिष मुसळे हिच्या प्रेरणादायी कलाप्रवासाचा वेध घेण्यात येणार आहे. हा विशेष कार्यक्रम रविवार, १२ जुलै रोजी सकाळी ९.३० वाजता प्रसारित होणार आहे.
या विशेष मुलाखतीत सोनाली सावंत यांनी स्वराशी संवाद साधत तिच्या भरतनाट्यमविषयी निर्माण झालेली आवड, नृत्य शिक्षणाचा प्रवास, सातत्यपूर्ण सरावाचे महत्त्व, विविध सांस्कृतिक कार्यक्रमांतील अनुभव तसेच शास्त्रीय नृत्यामुळे व्यक्तिमत्त्व विकासावर होणारा सकारात्मक परिणाम याविषयी सविस्तर चर्चा केली आहे.
भरतनाट्यम आणि शास्त्रीय नृत्याची आवड असलेल्या बालमित्रांसाठी तसेच पालकांसाठी हा कार्यक्रम प्रेरणादायी आणि मार्गदर्शक ठरणार असून, कला क्षेत्रात करिअर घडवू इच्छिणाऱ्या विद्यार्थ्यांसाठीही तो उपयुक्त ठरेल.
या कार्यक्रमाचे सादरकर्ते विवेक वानखडे आहेत. श्रोत्यांना हा कार्यक्रम आकाशवाणी रत्नागिरीच्या मध्यम लहरी ११४३ किलोहर्ट्झ, एफएम १०१.५ मेगाहर्ट्झ तसेच NewsOnAir या मोबाईल अॅपवर ऐकता येणार आहे. याशिवाय आकाशवाणी रत्नागिरीच्या अधिकृत YouTube (airratnagiri1248) आणि Facebook/Instagram (@airratnagiri) या सोशल मीडिया माध्यमांवरही कार्यक्रम उपलब्ध होणार आहे.
बालकांमधील सुप्त कलागुणांना व्यासपीठ उपलब्ध करून देण्याच्या उद्देशाने आकाशवाणी रत्नागिरीचा ‘बाल जगत’ हा उपक्रम सातत्याने दर्जेदार कार्यक्रम सादर करत असून, यावेळचा स्वरा आशिष मुसळे हिच्या प्रेरणादायी प्रवासावर आधारित विशेष भाग श्रोत्यांसाठी निश्चितच आकर्षणाचा विषय ठरणार आहे.
